Məşhur aktrisadan gözlənilməz açıqlama: "Mirasımı oğluma verməyəcəm"

  Britaniyalı model və aktrisa Elizabet Hörli verdiyi son müsahibəsində oğlu Demianın ondan miras gözləməməli olduğunu bildirib.

60 yaşlı aktrisa "The Mirror" qəzetinə açıqlamasında yaxınlarının da ondan miras gözləməməli olduğunu deyib: "Mən də öz ailəmdən heç vaxt miras gözləmədim. Ən sevdiyim böyük xalamdan qalma kiçik çini qəhvə fincanlarım var. Hər dəfə espresso içəndə onu xatırlayıram. Mənim üçün qalan şeylərin dəyəri maddi deyil, mənəvidir".



"Sevdiyim hər kəsin hər qəpiyini əylənərək xərcləmiş biri kimi mənə baxmasını istəyirəm. Mən miras almaq və ya miras qoymaq üçün yaşamıram", - deyə Hörli bildirib.

"Miras" adlı yeni reallıq şousunda iştirak edən aktrisa, oğluna nə qalacağı barədə suala isə belə cavab verib: "Miras qoymağa inandığımı kim dedi? Mən boş-boş gəzə bilərəm və ölümümə qədər bütün sərvətimi xərcləyə bilərəm".




Karyerasına model kimi başlayan, daha sonra kino və televiziya ilə məşğul olan Hörli, özünün mayo və bikini markasından da böyük gəlir əldə etməyə davam edir. Bir vaxtlar aktyor Hyu Qrant ilə yaşadığı münasibətlə gündəmə gələn Hörli tək evliliyini hind əsilli iş adamı Arun Nayarla etmiş, 2011-ci ildə boşanmışdı.

Onun yeganə övladı Demian amerikalı iş adamı Stiv Binq ilə münasibətindən dünyaya gəlib. DNA testi ilə atasının Binq olduğu sübuta yetirilsə də, milyarder əvvəlcə övladını qəbul etməmişdi. Binq 2020-ci ildə vəfat edib.



Demian Hörli anasına olan inanılmaz bənzərliyi ilə tanınır və anası kimi modellə məşğuldur. Onun xaç atası isə Hörlinin keçmiş sevgilisi, hazırda isə yaxın dostu olan Hyu Qrantdır.

Aktrisanın şəxsi həyatı da gündəmdə qalır. O, bir neçə ay əvvəl məşhur müğənni Billi Rey Sayrus ilə münasibətə başlayıb. İkili, gözlənilməz birlikdəliklərinə baxmayaraq, xoşbəxt olduqlarını göstərən fotolar paylaşmağa davam edir.