İran parlamentinin Milli Təhlükəsizlik və Xarici Siyasət Komitəsinin nümayəndəsi İbrahim Rezayi ölkənin müharibəyə hazırlaşmalı olduğunu bəyan edib. Bu açıqlama Avropa dövlətlərinin İranla bağlı sanksiyaları bərpa etmək qərarı fonunda səslənib.
İran parlamenti həmçinin Nüvə Silahlarının Yayılmaması Müqaviləsindən (NPT) tam çıxışı nəzərdə tutan təcili qanun layihəsini müzakirəyə çıxarmağa hazırlaşır.
Sənəd sabah təqdim olunacaq və gələn həftə müzakirə ediləcək.
Bundan əvvəl Böyük Britaniya, Almaniya və Fransa BMT Təhlükəsizlik Şurasına müraciət edərək “snapback” mexanizmi çərçivəsində İranın maliyyə, bank, enerji və müdafiə sektorlarına qarşı sanksiyaların 30 gün ərzində bərpa olunacağını açıqlamışdı.
ABŞ dövlət katibi Marko Rubio bəyan edib ki, Vaşinqton diplomatiyaya açıq qalır, lakin Tehran “nüvə silahı əldə etmək fikrindən dərhal daçınmalı və bu istiqamətdə addımlar atmalıdır”.
İran XİN isə bildirib ki, Avropa ölkələrinin qərarı Tehranla MAQATE arasında əməkdaşlığı zəiflədəcək və ölkə adekvat cavab tədbirləri görəcək.
Diplomatik mənbələrə görə, avqustun 29-da BMT Təhlükəsizlik Şurasında bu məsələ ilə bağlı qapalı məsləhətləşmələr keçiriləcək.
N.Təbrizli
