Qeyd edək ki, ŞƏT sammiti avqustun 31-dən sentyabrın 1-dək Tyançzin şəhərində keçiriləcək.
Maraqlıdır, Ermənistan və Azərbaycanın eyni vaxtda ŞƏT-ə üzvlük üçün müraciət etməsi regionun geosiyasi balansına necə təsir göstərə bilər?
"Şanxay Əməkdaşlıq Təşkilatına iki ölkənin - Azərbaycan və Ermənistanın üzv olması, şübhəsiz ki, Cənubi Qafqaz regionunun təhlükəsizlik arxitekturasının güclənməsi baxımından mühüm əhəmiyyət kəsb edir".
_(1).jpg)
Bu sözləri Olaylar.az-a açıqlamasında siyasi şərhçi Zeynal Əmrəliyev deyib. Siyasi şərhçi bildirib ki, təşkilata üzv ölkələrin əksəriyyəti təhlükəsizlik sahəsində, xüsusən terrorizmə qarşı mübarizədə fəal əməkdaşlıq edir, eyni zamanda iqtisadi əməkdaşlıq sahəsində də sıx əlaqələrə malikdir: "Bütün bunlar Cənubi Qafqazda sülh və sabitliyin qorunması, həmçinin Azərbaycan və Ermənistan arasında münasibətlərin normallaşması üçün mühüm amil ola bilər. Sülh müqaviləsindən sonra iki ölkə arasındakı münasibətlərin daha yüksək səviyyədə inkişaf etməsi və nəticədə Cənubi Qafqazda vahid təhlükəsizlik arxitekturasının yaradılması bu baxımdan olduqca əhəmiyyətlidir. Paralel olaraq regiona daha çox investisiyanın cəlb edilməsinə də şərait yarada bilər".
Z. Əmrəliyev qeyd edib ki, ŞƏT-ə üzv ölkələr arasında iqtisadi əməkdaşlıq olduqca yüksək səviyyədədir. Bu da imkan verəcək ki, Azərbaycan və Ermənistan məhz həmin ölkələr vasitəsilə güclü iqtisadi yardım paketləri əldə etsinlər. Düşünürəm ki, hər iki ölkənin təşkilata üzv olması onların Şərqin güclü dövlətləri ilə əməkdaşlığını daha da gücləndirəcək. Burada xüsusilə Çinin rolunu qeyd etmək lazımdır.
"Son illərdə Çin həm Azərbaycana, həm də Ermənistana ciddi maraq göstərir. Azərbaycanın və Ermənistanın ŞƏT-ə üzvlüyü bu marağın daha da artmasına səbəb olacaq. Eyni zamanda bu addım Cənubi Qafqaz və Mərkəzi Asiya regionlarının bir-birinə yaxınlaşmasının əsasını qoya bilər. Çünki ŞƏT-in əsas üzvləri məhz Mərkəzi Asiya ölkələridir. Bu isə Cənubi Qafqaz ilə Mərkəzi Asiya arasında təhlükəsizlik və iqtisadi əməkdaşlığın güclənməsinə mühüm təkan verə bilər," - deyə siyasi şərhçi sonda vurğulayıb.
Sevda Dəniz
