.jpg)
LƏNKƏRAN, 28 avqust. TELEQRAF
Lənkəranda “Sonalar bağı” baxımsızlıq ucbatından viranəyə çevrilib.
Teleqraf-ın Cənub bürosu xəbər verir ki, Lənkəran şəhərində yerləşən və bir vaxtlar sakinlərin sevimli istirahət mərkəzi olan “Sonalar bağı” hazırda acınacaqlı vəziyyətdədir.
Bağa daxil olan hər kəsi qırılmış iri gövdəli ağaclar, budaqlar arasında itib-batmış karusel və ətrafa yayılmış məişət tullantıları qarşılayır. Ərazinin sıx kol-kosla əhatə olunması, üstəgəl uzun müddət baxımsız qalması buranı zibil tullantılarının məkanına çevirib. Yaşıllıq zolağının hər küncündə qalaq-qalaq zibillərə rast gəlinir. Bir vaxtlar ahılların və uşaqların asudə vaxtını rəngarəng keçirdiyi park indi daha çox sahibsiz itlərin və çöl heyvanlarının məskəninə çevrilib.
Şəhər sakinləri bildirirlər ki, kanalizasiya sularının buraya axıdlması xüsusən yay aylarında ətrafda kəskin qoxunun yayılmasına səbəb olur.
Qeyd edək ki, ötən əsrin 70-ci illərində abadlaşdırılan bu əraziyə həmin dövrdə quruculuq işləri aparmış Sona adlı xanımın adı verilib. Keçmiş park Lənkəran dəmiryolu vağzalının yaxınlığında yerləşir.
Məsələ ilə bağlı Lənkəran Şəhər İcra Hakimiyyətindən Teleqraf-a bildirilib ki, park hazırda ərazi özəl mülkiyyətdədir. Bu səbəbdən burada abadlıq və quruculuq işlərinin aparılması yalnız ərazi sahibinin səlahiyyətlərinə daxildir.
.jpg)
.jpg)
.jpg)
