Kim Çen In Çini ziyarət edəcək...
Poliqon xəbər verir ki, Şimali Koreya Xalq Demokratik Respublikasının (KXDR) lideri Kim Çen In yaxın günlərdə Çini ziyarət edəcək. Onun səfərinin məqsədi Çinin Yapon işğalçılarına qarşı Müqavimət Müharibəsində və İkinci Dünya müharibəsində qələbənin 80 illiyinə həsr olunmuş tədbirlərdə iştirak etməkdir. Məlumatı Cənubi Koreyanın Yonhap Agentliyi yayıb.
Rəsmi məlumata görə, 3 sentyabrda Pekində genişmiqyaslı hərbi parad keçiriləcək. Paradda Çinin milli istehsalı olan ən yeni hərbi texnikalar nümayiş etdiriləcək. Tədbirdə bir sıra ölkə liderlərinin, o cümlədən Rusiya prezidenti Vladimir Putinin də iştirakı gözlənilir.
Ekspertlər qeyd edirlər ki, Kim Çen In-ın bu səfəri Çin-Şimali Koreya münasibətlərində strateji yaxınlaşmanın daha bir göstəricisidir. Son illərdə Pxenyan və Pekin arasında hərbi və siyasi əməkdaşlıq xüsusilə regionda artan gərginlik fonunda intensivləşib. Paradın beynəlxalq səviyyədə güc nümayişinə çevriləcəyi və Çin rəhbərliyinin həm ölkə daxilində, həm də xarici arenada mövqelərini gücləndirmək üçün mühüm mesaj verdiyi vurğulanır.
Poliqon.info
