Aktrisa "Titanik" filmindəki bu səhnə üçün peşmandır

"Oskar" mükafatlı britaniyalı aktrisa Keyt Vinslet, "Titanik" filmindəki məşhur səhnələrdən biri ilə bağlı illər sonra peşmanlığını dilə gətirib.

 

Aktrisa, Ceyms Kemeronun 1997-ci ildə ekranlaşdırdığı "Titanik" filmindəki çılpaqlıq səhnəsini bu gün artıq məmnuniyyətlə xatırlamadığını bildirib. 49 yaşlı Vinslet gənc yaşlarında karyerasını sübut etmək istəyi ilə bu cür qərarlar verdiyini etiraf edib.

 

"Kaş ki, bədənimi bu qədər göstərməsəydim", - deyə sənətçi qeyd edib və əlavə edib ki, o zaman bu qərar ona düzgün görünsə də, zaman keçdikcə bu səhnəyə münasibəti dəyişib.

 

Aktrisa həmçinin bildirib ki, illər keçsə də, bəzi pərəstişkarlar həmin səhnənin təsviri olan fotolara imza istəməyə davam edir və bu, onu hələ də narahat edir.

 

Qeyd edək ki, "Titanik" filmi 1997-ci il noyabrın 18-də nümayiş olunub. Ekran işində Leonardo DiKaprio "Cek Douson", Keyt Vinslet isə "Roza Dyuitt Byukeyter" obrazı ilə dünya şöhrəti qazanıblar. İkili daha sonra 2008-ci ildə "İnqilab yolu" filmində yenidən birgə kamera qarşısına keçiblər./Milli.Az