Tailandın şimal-şərqində sıx meşəliklərin arasında ucalan üç nəhəng qaya kütləsi ilk baxışda adi bir təbii quruluş təsiri bağışlaya bilər. Lakin göydən və ya yüksək bir nöqtədən baxıldıqda bu qayalar, yan-yana üzən balina ailəsini xatırladan görünüşləri ilə diqqət çəkir. Min illər boyu külək, yağış və zamanın təsiri ilə formalaşan qayalar, sanki təbiətin səbrli əlləri ilə oyulmuş kimidir. Yerli əhalinin "Three Whale Rock” - "Üç balina qayası” adlandırdığı bu təsirli quruluş həm təbii gözəlliyi, həm də geoloji əhəmiyyəti ilə seçilir.
Bu unikal qaya forması Tailandın Laos sərhədinə yaxın bir bölgəsində, Phu Sing meşə parkının ərazisində yerləşir. Parkın qorunan meşəlik sahələrindən keçən yürüş yolları ilə qayalara çatmaq mümkündür. Ziyarətçilərə yalnız "ana” və "ata” adlandırılan iki böyük qayanın üzərinə çıxmağa icazə verilir, ən kiçik "balaca” qaya isə qoruma məqsədilə bağlı saxlanılır.
Qayaların ən diqqətçəkən tərəfi yüzlərlə metr boyunca uzanan səthlərinin yaşıl meşənin üzərində balina kimi süzülməsidir. Onların üzərinə qalxanlar bölgəni quşbaxışı izləyə bilir, hətta açıq havalarda Mekonq çayının qıvrımları belə görünür.
Üç balina qayasının yaranma tarixi isə görünüşündən qat-qat qədimdir. Təxminən 75 milyon il əvvəl bölgədəki qumdaşı təbəqələrinin uzunmüddətli eroziya və yer hərəkətləri nəticəsində ucalması ilə formalaşan bu quruluş, zamanla çatlayaraq bugünkü üç ayrı qaya formasını alıb. Küləyin və suyun təsiri ilə səthləri hamarlaşan qayalar təbiətdə öz-özünə meydana gələn ən təsirli görüntülərdən birinə çevrilib.
Bölgə, milyon illər əvvələ aid geoloji qatlara sahib Khorat platosunun bir hissəsi hesab olunur. Xüsusilə Təbaşir dövrünə aid torpaq quruluşu və tapılan fosil nümunələri ilə də elmi baxımdan böyük əhəmiyyət daşıyır. Bu səbəbdən Üç balina qayası yalnız maraqlı mənzərə deyil, həm də bölgənin təbii tarixinə açılan sakit bir pəncərədir.
Bu gün Phu Sing meşə parkı və ətrafındakı qaya formaları Tailandın həm təbii, həm də mədəni irs sahələrindən biri kimi qorunur. Təbiətsevərlər və səyahətçilər üçün getdikcə daha çox maraq doğuran bir məkan olan Üç balina qayası həm mənzərəsi, həm də təbiətlə qurduğu səssiz və təsirli bağ ilə zamanın izlərini daşıyan canlı bir şahid kimi qəbul edilir. \\Qaynarinfo
