Son 20 ildə ilk dəfə Ukrayna klublarından heç biri UEFA Çempionlar Liqasının əsas mərhələsində çıxış etməyəcək.
Msport.az xəbər verir ki, Kiyev “Dinamo”su III təsnifat mərhələsinin cavab oyununda Kiprin “Pafos” komandasına 0:2 (ilk matçda – 0:1) hesabı ilə uduzaraq, qitənin ən nüfuzlu klub turnirində mübarizəni dayandırıb.
Belə hal sonuncu dəfə 2005-06 mövsümündə yaşanmışdı. O vaxt da Ukrayna klublarından heç biri Çempionlar Liqasının qrup mərhələsinə vəsiqə qazana bilməmişdi. Həmin dövrdə “Dinamo” İsveçrənin “Tyun” (2:2, 0:1), “Şaxtyor” isə İtaliyanın “İnter” (0:2, 1:1) klubuna uduzmuşdu.
Qeyd edək ki, ötən mövsüm Ukrayna çempionatında 3-cü yeri tutan “Şaxtyor” Avropa Liqasında mübarizə aparır.
