Qardaş Türkiyədə sosial medianın müxtəlif seqmentlərində üstünlük təşkil edən bir qrup var.
Onların dərdi-səri Azərbaycandır.
KONKRET.az xəbər verir ki, uzun illərdir ölkəmizi rusyanlısı olmaqda ittiham edirlər.
Putin istəməsə, bu coğrafiyada yarpaq belə qımıldamazmış və s.
Sən demə Azərbaycanı çoxdan Putinə peşkəş çəkmişik…
Bir də baxırsan hansısa bir cübbəli ağzı köpüklənə-köpüklənə yazır: “azeriler rus uşağıdır…”
Şərbazın arxasınca şərhbazlar səf tutur, təhqirin biri bir qəpik…
Alışdıq bunlara, palçıq molekulu qədər əhəmiyyət daşıyırlar.
İntəhası, məlum qrup bir gündə U dönüşü edərək hətta bizi də təəcübləndirdi.
İndi olmuşuq Amerikanpərəst.
Ölkəmizi qızıl məcməyidə Trampa təqdim edirmişik.
Yenə baxırsan ki, hansısa bir cübbəli tələm-tələsik ehkam kəsir: “şu azeriler hepsi amerikan uşağıdır…”
Şər(h)bazlar durna qatarı tək düzülürlər: “bunlar kardeş-mardeş değildir, siyonistler hep…”
İntəhası, çatdıra bilmirik, fantaziyalara uyğun olaraq bir gecədə ruspərəstdən amerikanpərəstə şevrilmək üçün gərəkli sürətə sahib deyilik.
Gərək, qardaş ölkədəki məlum qruplaşma bir qərar versin, biz də işimizi ona görə quraq.
Çünki eyni zamanda həm Rusiyapərəst, həm Amerikapərəst olmaq çətindir.
Qurdlar vadisi serialı, təssüf ki, həm Azərbaycanda, həm Türkiyədə cahil ordusu da yaratdı.
Daha doğrusu var olanı üzə çıxardı.
İntəhası, bu cahillər vadidə yox sosial mediada veyillənirlər.
Arazın o tərəfindən ney səsinə aşinadırlar…
Yaxşı ki, qardaş ölkədə aydın insanlar özləri adekvat cavab verirlər.
Bəhruz Həsənov,
Politoloq
