BAKI, TurkicWorld , Fərid Mikayılov
Yəmən Silahlı Qüvvələrinin sözçüsü briqada generalı Yahya Sari, Qəzza zolağında fələstinlilərə dəstək məqsədilə İsrail hədəflərinə qarşı üç yeni pilotsuz uçuş aparatı (PUA) əməliyyatı həyata keçirildiyini açıqlayıb.
TurkicWorld xəbər verir ki, Sari bazar günü gecə verdiyi açıqlamada son hücumların Təl-Əviv, Aşkelon və Hayfa limanını hədəfə aldığını bildirib.
General qeyd edib ki, əməliyyatlar həm fələstin xalqına və döyüşçülərinə dəstək məqsədilə, həm də İsrailin Qəzza əhalisinə qarşı törətdiyi cinayətlərə və aclıq siyasətinə cavab olaraq həyata keçirilib.
Sari, həmçinin hücumların, bazar günü İsrailin Milli Təhlükəsizlik Naziri İtamar Ben-Qvirin rəhbərliyi ilə radikal yəhudi qruplarının Əl-Əqsa Məscidinə basqınına cavab olaraq həyata keçirildiyini vurğulayıb.
Onun sözlərinə görə, Qəzzada davam edən soyqırıma qarşı səssizlik bütün İslam dünyasına ləkədir və bu vəziyyət gec-tez Qərbi Asiyadakı bütün ölkələr üçün ağır nəticələr doğuracaq.
Sari bildirib ki, Yəmənin fələstinlilərə dəstək məqsədli əməliyyatları təcavüz dayanana və Qəzza zolağındakı mühasirə aradan qaldırılana qədər davam edəcək.
