Doğru.az xəbər verir ki, Azərbaycanın mədəniyyət paytaxtlarından biri olan Xankəndidə Diaspor Gənclərinin VI Yay Düşərgəsinin açılış mərasimi keçirilib. Bu möhtəşəm tədbir Diasporla İş üzrə Dövlət Komitəsi və Heydər Əliyev Fondunun birgə təşkilatçılığı ilə reallaşıb.
“Konstitusiya və Suverenlik İli”nə həsr olunan düşərgədə dünyanın 61 ölkəsindən 128 azərbaycanlı və Azərbaycana dost münasibəti bəsləyən gənclər iştirak edir. Onlar Qarabağın azad olunmuş torpaqlarında bir araya gələrək həmrəyliyin, milli birliyin və vətən sevgisinin canlı nümayişinə çevriliblər.
Düşərgə proqramı son dərəcə zəngindir. Gənclər Azərbaycanın diaspor siyasəti, Qarabağın bərpası və dövlətçilik prinsipləri ilə bağlı geniş məlumatlar əldə edəcək, müxtəlif sahələr üzrə ekspertlərlə görüşəcək, şəhid ailələrinin üzvləri və qazilərlə bir araya gələcəklər. Eyni zamanda, Ana dili dərsləri, intellektual oyunlar, mədəni proqramlar və ekskursiyalarla dolu dolu günlər keçirəcəklər.
Qeyd edək ki, Diaspor Gənclərinin Yay Düşərgəsi artıq Şəki, Şamaxı, Şuşa, Naxçıvan və Laçın kimi şəhərlərdə baş tutub və hər il bu layihəyə maraq daha da artır. Bu dəfə isə düşərgənin Qarabağın simvolik şəhəri Xankəndidə keçirilməsi xüsusi rəmzi məna daşıyır.
Dövlətimizin gücü və xalqımızın birliyi ilə bu torpaqlarda həyat yenidən canlanır. Diaspor gənclərinin Qarabağla tanışlığı isə gələcəyə uzanan bir körpüdür.
DOĞRU.AZ
