Cənubi Karolina ştatının Savannah çayı sahilində əvvəllər nüvə silahı komponentləri istehsal edən obyektdə radioaktivlik səviyyəsi qanuni həddən 10 dəfə yüksək olan arı yuvası aşkar edilib.
Xalqcebhesi.az xəbər verir ki, ABŞ Energetika Nazirliyinin dərc etdiyi hesabata görə, yuva iyulun 3-də obyektdə adi radiasiya yoxlamaları zamanı aşkar edilib.
Hesabatda yuvada yaşayan arıların öldürüldüyü, daha sonra yuvanın torbalara yığılaraq radioloji tullantı kimi atıldığı bildirilib. Hesabatda hadisədən sonra ərazidə heç bir arıya rast gəlinmədiyi, ətraf mühitə və ya əhalinin sağlamlığına heç bir təsirinin olmadığı bildirilib.
Keçmiş nüvə fəaliyyətlərinin qalığı
Yuvanın tapıldığı dirək milyonlarla qallon maye nüvə tullantılarını saxlayan çənlərin yaxınlığında yerləşir. Bununla belə, rəsmilər yuvadakı radiasiyanın hər hansı tullantı sızmasından deyil, “obyektin keçmişindən radioaktiv çirklənmədən” qaynaqlandığını bildiriblər.
Savannah çayı sahəsi 1950-ci illərdə nüvə bombaları üçün plutonium istehsal etmək üçün yaradılmışdır. Soyuq Müharibə dövründə ABŞ-ın nüvə silahı istehsalında mühüm rol oynayan bu nəhəng obyekt hazırda nüvə enerjisi sahəsində fəaliyyət göstərir. Energetika Nazirliyinin hesabatına görə, yuvada aşkar edilən yüksək radiasiya səviyyəsinin orada yaşayan arıların dözə biləcəyindən qat-qat artıq olduğu vurğulanıb. Arıların yuvalarından cəmi bir neçə yüz metr məsafədə uça bildiyi, bu yuvanın obyektin 800 kvadrat kilometrlik ərazisinin ortasında yerləşdiyi və çöldə yayılma riskinin son dərəcə aşağı olduğu bildirilib.
Məryəm Quliyeva
