ABŞ Ticarət Nazirliyi iyun ayına dair xarici ticarət, topdan satış və pərakəndə ehtiyatlara dair məlumatları açıqlayıb. Rəqəmlərə əsasən, ölkənin mal ticarətindəki "öncü" kəsiri may ayı ilə müqayisədə 10,8% azalaraq 86 milyard dollara düşüb. Bu göstərici, analitiklərin 98,3 milyard dollarlıq proqnozundan xeyli aşağı olub.
News24.az xəbər verir ki, may ayında mal ticarəti kəsiri 96,4 milyard dollar təşkil etmişdi.
İyunda ABŞ-ın mal ixracı 1,1 milyard dollar azalaraq 178,2 milyard dollara düşsə də, ithalatdakı 11,5 milyard dollarlıq azalma (264,2 milyard dollara gerilədi) ticarət kəsirini ciddi şəkildə aşağı salıb.
Eyni dövrdə topdan satış ehtiyatları aylıq 0,2% artaraq 907,7 milyard dollara, pərakəndə ehtiyatlar isə 0,3% artımla 808,7 milyard dollara yüksəlib.
Bu göstəricilər, ABŞ-da ticarət balansında müəyyən sabitləşmə əlamətlərini ortaya qoysa da, ixracın zəifləməsi və tələbin azalması iqtisadi baxımdan diqqətlə izlənilməli tendensiya olaraq qalır.
Xeyrənsə Piriyeva
