ABŞ Prezidenti Donald Tramp xarici yardımlar və dövlət yayımına ayrılmış 9 milyard dollarlıq maliyyənin ləğvini nəzərdə tutan qanun layihəsini imzalayıb...
Poliqon xəbər verir ki, bu barədə CBS News telekanalı və OPB.org portalı məlumat yayıb.
Ağ Evin sözçüsü Harrison Filds cümə axşamı bildirib ki, bu paket “rəsmi olaraq imzalanıb”. Bu, son on ildə ilk dəfədir ki, Konqres prezidentin əvvəllər təsdiqlənmiş büdcə vəsaitlərinin geri çağırılması ilə bağlı müraciətini qəbul edir.
Ləğv edilən vəsaitin əsas hissəsi xarici yardım proqramlarına yönəldilmişdi. Təxminən 1,1 milyard dollar isə İctimai Yayım Korporasiyasına ayrılmışdı ki, bu qurum ABŞ-da fəaliyyət göstərən NPR və PBS kimi ictimai radio və televiziya şəbəkələrini maliyyələşdirir. Bu vəsaitlər əsasən ölkə üzrə 1500-dən çox yerli ictimai media stansiyasına paylanırdı.
Ağ Ev bu qanunu Konqres üçün bir “sınaq halı” adlandırıb və bəyan edib ki, gələcəkdə də bu cür maliyyə ixtisar paketləri həyata keçiriləcək. Tramp administrasiyası dövlət yayım sistemini “siyasi qərəzli” və “artıq maliyyə yükü” kimi xarakterizə edib.
Xüsusilə konservativ siyasətçilər NPR və PBS-ə qarşı kəskin tənqidlər səsləndiriblər. Bununla belə, iri əyalət dairələrini təmsil edən bəzi qanunvericilər bu qərarın onların ştatlarında yerləşən yerli stansiyalara mənfi təsir göstərəcəyindən narahatlıqlarını bildiriblər. Onların fikrincə, bəzi stansiyalar fəaliyyətlərini tamamilə dayandırmaq məcburiyyətində qala bilər.
Xarici yardımların ixtisarı ilə bağlı Ağ Ev bildirib ki, bu qərar digər ölkələri humanitar böhranlara cavab tədbirlərində daha fəal iştirak etməyə təşviq edəcək. Həmçinin qeyd olunub ki, vəsaitlərin geri çağırılması amerikalı vergiödəyicilərinin maraqlarına daha uyğundur.
Demokratlar isə Respublikaçılar administrasiyasının xarici yardım proqramlarına qarşı sərgilədiyi bu mövqeyin ABŞ-ın beynəlxalq imicinə zərbə vuracağını və yaranacaq boşluğun Çin tərəfindən doldurula biləcəyini bildiriblər.
Onlar həmçinin xəbərdarlıq ediblər ki, bu ixtisarlar dünyanın ən yoxsul təbəqələri üçün fəlakətli nəticələr doğura bilər.
Xüsusilə, qanun layihəsinin son variantına, əvvəlcə nəzərdə tutulmuş, lakin sonradan tənqidlərin qarşısını almaq üçün çıxarılmış, SPİD-lə Mübarizə üzrə Prezidentin Təcili Planından (PEPFAR) 400 milyon dollarlıq vəsaitin ixtisarı daxil edilməyib.
Tramp administrasiyası ictimai yayımın bölgə səviyyəsində dəstəklənməsi üçün alternativ maliyyə mənbələri axtaracağını da vəd edib.
Eyni zamanda, Respublikaçılar Partiyasının nümayəndələri bəyan ediblər ki, bu paket “israfçılıq, dələduzluq və sui-istifadə” adlandırdıqları hallara qarşı maliyyənin geri qaytarılmasına yönəlmiş bir neçə tədbirdən yalnız ilkidir.
Poliqon.info
