Azərbaycan Respublikası Dövlət Neft Fondu (ARDNF) 2024-cü ili 7 milyard 858 milyon 250 min manat xalis mənfəətlə başa vurub. Fond 2023-cü ili 8 milyard 102 milyon 89 min manat xalis mənfəət ilə bağlamışdı.
Beləliklə, ARDNF-in xalis mənfəəti 2024-cü ildə 2023-cü illə müqayisədə 244 milyon 539 min manat və ya 3% azalıb.
Maraqlıdır, ARDNF-in mənfəətinin azalması ölkə iqtisadiyyatına necə təsir edəcək?
Xalid Kərimli: “Mənfəət azalsa da, Neft Fondu dövlət büdcəsinə bu il daha çox pul köçürəcək”
Iqtisadçı Xalid Kərimli “Bakı-Xəbər”ə şərhində bildirdi ki, ARDNF-in xalis mənfəətinin 244 milyon azalmasının hazırki şəraitdə ölkə iqtisadiyyatına hər hansı bir təsiri olmayacaq:”Dövlət Neft Fondunun ölkə iqtisadiyyatına təsiri yalnız ARDNF-dən transferlərin həcmi ilə bağlıdır. Hər il sonu Prezident İlham Əliyev və Milli Məclis büdcəni təsdiq edir. Mənfəət azalsa da, Neft Fondu dövlət büdcəsinə bu il daha çox pul köçürəcək . Bu səbəbdən də mənfəətin azalmasının cari vəziyyətə hər hansı bir təsiri yoxdur. Ancaq onu da deyim ki, mənfəətin azalması gələcəkdə pul köçürmələrinə təsir edəcək. Vəziyyət bu cür davam edərsə qarşıdakı illərdə Neft Fondunun pul ayırmalarına təsir edər”.
Kamran Məmmədli: “Neft Fondunun xalis mənfəətinin azalması hazırkı şəraitdə ölkə iqtisadiyyatına qabarıq şəkildə təsir etməyəcək”
Iqtisadçı Kamran Məmmədli hesab edir ki, hazırda əsas problem neftin özünün azalmasıdır. Neft getdikcə daha da çox azalacaq: “Bu hal neft gəlirlərinin azalmasına təsir edəcək. Neft Fondunun xalis mənfəətinin azalması hazırki şəraitdə ölkə iqtisadiyyatına qabarıq şəkildə təsir etməyəcək. Bu azalma qarşıdakı illərdə də davam edərsə, o zaman bunun təsiri hiss olunar. Bu səbəbdən də qeyri-neft sektorunun inkişafına daha çox diqqət edilməlidir. Bu sahənin inkişafı, gəlirin daha da artması üçün lazımi işlər görülməlidir. Qeyri-neft sektoru deyəndə turizmin inkişafı, aqrar sektorun qabağa getməsinə fikir verilməlidir. Ümumiyyətlə, qeyri-neft sektorunun inkişafı əsas prioritet olmalıdır”.
Günel CƏLİLOVA
