BAKI, 23 iyul. TELEQRAF
Quraqlıq, xəstəlik və tariflər qırmızı ət tədarükünü sərtləşdirdiyi üçün ABŞ-da istehlakçıların ət xərcləri tarixinin ən yüksək həddinə çatıb.
Teleqraf "Bloomberg"ə istinadən xəbər verir ki, ABŞ-nin Əmək Departamenti mal ətinin kiloqramının 13,49 dollara yüksəldiyini açıqlayıb.
Bu cari il üzrə ən yüksək qiymətdir. Mal ətinin qiyməti ötən illə müqayisədə 12 faiz, ilin əvvəli ilə müqayisədə isə 8 faiz artıb.
ABŞ Kənd Təsərrüfatı Departamentinin (USDA) məlumatına görə, biftek qiymətləri illik müqayisədə 8 faiz artaraq kiloqramı 23,34 dollara çatıb.
Bundan əlavə, ABŞ-nin ticarət siyasəti qiymətləri yüksəldir. Tramp administrasiyası avqustun 1-dən Braziliyadan idxal edilən qırmızı ətə 50% rüsum tətbiq edəcəyini açıqlayıb. Mövcud tariflərlə Braziliya əti ABŞ bazarına daxil olarkən təxminən 76% vergi yükü ilə üzləşəcək.
Qiymət artımları səbəbindən bir çox amerikalılar yemək vərdişlərini dəyişmək məcburiyyətindədirlər. Yuta ştatında hamburger şəbəkəsinin sahibi menyu qiymətlərini artırmamaq üçün hazırladığı köftələrin çəkisini 150 qramdan 130 qrama endirdiyini bildirib.
