Daşkəsən rayonunun 95 illiyinə həsr olunmuş növbəti Aqrar Biznes Festivalı Xoşbulaq kəndində təşkil edilib.
Doğru.az xəbər verir ki, Kənd Təsərrüfatı Nazirliyinin Aqrar İnnovasiya Mərkəzi tərəfindən keçirilən festivalda rayon İcra Hakimiyyətinin başçısı Orxan Abbasov, Aqrar İnnovasiya Mərkəzinin direktoru Anar Cəfərov, ADDA-nın rektoru Zəfər Qurbanov, institut rəhbərləri, fermerlər, sahibkarlar, şəhid ailələri, qazilər və yerli sakinlər iştirak ediblər.
Festival çərçivəsində kənd təsərrüfatı texnikası, yerli məhsullar, əl işləri və sənətkarlıq nümunələri nümayiş olunub. “Daşkəsən–95” mövzusunda rəsm və foto sərgisi, milli mətbəx nümunələri, uşaqlar üçün əyləncə proqramları da maraqla qarşılanıb.
Orxan Abbasov çıxışında Daşkəsənin aqrar potensialına toxunaraq bu cür tədbirlərin kənd təsərrüfatının inkişafına töhfə verdiyini bildirib. Anar Cəfərov isə festivalların məqsədinin aqroturizmi inkişaf etdirmək, yerli məhsullara marağı artırmaq və ixrac imkanlarını genişləndirmək olduğunu vurğulayıb.
Festival “Ən yaxşı stend” müsabiqəsi, konsert və möhtəşəm atəşfəşanlıqla başa çatıb.
DOĞRU.AZ
