Qanda natriumun səviyyəsi, ürək ritmini tənzimləmək üçün dərman qəbul edən, flekaimid istifadə edən pasiyentlər üçün əsas göstəricilərdən biridir.
BAKU.WS xəbər verir ki, ABŞ-ın Virciniya ştatındakı tədqiqatçılar araşdırmalar aparıblar. Onlar sübut ediblər ki, qandakı natriumun azacıq azalması belə, ürək keçiriciliyini ciddi şəkildə poza bilər. Bu barədə Heart Rhythm (HR) jurnalında dərc olunan elmi işdə məlumat verilib.
Alimlər ürək modeli insanınkına yaxın olan dəniz donuzlarında təcrübə aparıblar. Məlum olub ki, natrium kanallarını bloklayan dərmanlar qəbul edildikdə ürək natriumun azalmasına qarşı daha həssas olur. Bu azalma isə müxtəlif səbəblərdən baş verə bilər: qusma, ishal, sidikqovucu dərmanlar, digər preparatlar, həmçinin xəstəxanaya yerləşdirilmiş və ya yaşlı pasiyentlərdə.
Tədqiqatın aparıcı müəllifi, Virciniya Texnologiya Universitetinin Fralin Tədqiqat İnstitutunun əməkdaşı Stiven Poelzin bildirib:
"Həkimlər uzun zamandır bilirlər ki, natrium kanallarını bloklayan dərmanlar keçiriciliyi zəiflədir, az natrium isə risk yaradır. Ancaq biz ilk dəfə göstərdik ki, bu iki faktor birlikdə xüsusilə təhlükəlidir."
Natrium kanalları qismən bağlandıqda, ürək elektrik siqnallarını alternativ yollarla keçirməyə çalışır. Bu proses iki əsas mexanizmlə gedir:
Hüceyrələrarası sıx əlaqə ilə siqnal ötürülməsi;
Elektrik potensialının bərpasına cavabdeh olan kalium ionlarının axını.
Lakin qanda natrium azaldıqda, bu yolların effektivliyi aşağı düşür, siqnal isə ürəkdə gecikmə ilə yayılır.
