Ağstafa Rayon İcra Hakimiyyətinin başçısı Seymur Orucov vətəndaşların növbəti səyyar qəbullarını Köhnəqışlaq və Həsənsu kəndlərində keçirib.
"Unikal" xəbər verir ki, Müvafiq qrafikə uyğun olaraq Köhnəqışlaq və Həsənsu kəndində təşkil olunan növbəti səyyar qəbullarda rayonun hüquq-mühafizə strukturlarının rəhbərləri, RİH başçısı aparatının və aidiyyəti təşkilatların məsul şəxsləri, yerli ictimaiyyətin nümayəndələri iştirak ediblər. Seymur Orucov Ağstafa rayonunda davamlı qaydada həyata keçirilən abadlıq-quruculuq, əsaslı təmir işlərindən söz açaraq qeyd edib ki, Prezident İlham Əliyevin rəhbərliyi ilə suveren Azərbaycanın hər bir bölgəsində icra olunan bu cür tədbirlər əhalinin sosial rifah halının daha da yaxşılaşdırılmasına, vətəndaş məmnunluğunun artırılmasına xidmət edir.
Qəbullarda vətəndaşların qaldırdıqları məsələlər qeydiyyata alınaraq nəzarətə götürülüb. İrəli sürülən təklif və müraciətlərə dair müzakirələr aparılıb, hər bir məsələnin həlli tədbirləri müəyyən edilib.
