Sofiya prokurorluğu Türkiyənin “Botaş” dövlət qaz şirkəti ilə Bolqarıstanın “Bulgargaz” şirkəti arasında 2023-cü ildə bağlanmış müqavilənin şərtləri ilə bağlı araşdırmaya başlayıb.
Hafta.az-ın yazdığına görə, 13 illik müqaviləyə əsasən, “Bulgargaz” LNG qəbul etmək və yanacağı “Botaş” şəbəkəsi ilə Bolqarıstana nəql etmək üçün Türkiyə terminallarından istifadə etmək hüququ əldə edib. Müqavilə Bolqarıstanın 2022-ci ildə Rusiya xammalından asılılığına son qoyduqdan sonra qaz tədarükünü diversifikasiya etmək səylərinin bir hissəsi idi.
Bununla belə, hazırkı energetika naziri Jeço Stankovun qeyd etdiyi kimi, müqavilə böyük borcun yaranmasına gətirib çıxarıb - bolqarlar mahiyyətcə istifadə olunmamış gücə görə ödəyirlər. Onun sözlərinə görə, “Bulgargaz” artıq “Botaş”a təxminən 600 milyon leva (təxminən 359 milyon dollar) ödəyib.
"Hazırda sübutların toplanması və yoxlanılması istiqamətində prosessual və istintaq hərəkətləri həyata keçirilir", - prokurorluqdan bildiriblər. Qeyd olunur ki, artıq iş üzrə təqsirləndirilən şəxslərdən birinin evində axtarış aparılıb.
Novinite.com portalının məlumatına görə, Türkiyə tərəfi ilə birbaşa danışıqlar aparan və müqavilə imzalayan keçmiş energetika naziri Rosen Xristovun evində axtarış aparılıb. Müstəntiqlər onun telefonunu və noutbukunu götürüblər. Xristov özü heç bir günahı boynuna almadığını və istintaqı siyasi motivli hesab etdiyini bildirib.
Aİ-nin üzvü olan Bolqarıstan uzun müddət demək olar ki, tamamilə Rusiya qazından asılıdır, lakin 2022-ci ildən aktiv olaraq alternativ tədarüklər axtarır. Türkiyə ilə saziş enerji təhlükəsizliyi və tədarüklərin şaxələndirilməsi istiqamətində mühüm addım kimi təqdim edilib.
