Bu səfər 2020-ci ildə Britaniyanın Avropa İttifaqından çıxmasından sonra bir Avropa liderinin Londona etdiyi ilk dövlət səfəsidir. Keir Starmerin əsas məqsədlərindən biri, Makronu sığınacaq axtaran şəxslərlə bağlı "geri qəbul" razılaşmasına razı salmaq olacaq.
Belə bir razılaşma, Baş nazirin La-Manş boğazı vasitəsilə Britaniyaya gələn on minlərlə qanunsuz miqrantın qarşısını almaqla bağlı verdiyi vədi yerinə yetirməsinə kömək edə bilər. Makron çərşənbə axşamı bildirib ki, bu məsələ ilə bağlı Fransa və Britaniya daxili işlər nazirləri artıq danışıqlar aparıblar və bu həftə konkret nəticələrin əldə ediləcəyinə ümid edir.
Fransa daha öncə bu tip razılaşmanı rədd etmiş və Böyük Britaniyanın bu məsələdə bütövlükdə Avropa İttifaqı ilə danışıqlar aparmalı olduğunu bildirmişdi. Starmerin planına əsasən, Britaniya qeyri-qanuni sığınacaq axtaran bir şəxsi Fransaya göndərəcək, əvəzində isə legitim statusa malik bir sığınacaq axtaranı qəbul edəcək.
Lakin Makron həm də "miqrasiyanı cazibədar edən amillərə" toxunaraq bildirib ki, belə bir razılaşma üçün Starmer qeyri-qanuni statusda olan miqrantların Britaniyada yaşaması və işləməsini çətinləşdirməlidir.
Bundan əlavə, iki ölkə Ukrayna ilə Rusiya arasında mümkün atəşkəs halında Ukraynaya dəstək üçün birgə hərbi qüvvə yaratmaq istiqamətində də əməkdaşlıq edirlər. Makronun çərşənbə axşamı çıxışında ticarət və müdafiə sahəsində əməkdaşlıq da əsas mövzulardan olub.
Makron və Starmer həmçinin biznes liderləri ilə görüşdə iştirak edəcəklər. Fransa şirkəti "Engie" çərşənbə günü açıqlayıb ki, Britaniyada enerji saxlama layihələrinə 1,2 milyard avro (1,41 milyard dollar) sərmayə yatıracaq. Bu addım, Fransanın EDF şirkətinin Şərqi İngiltərədəki nüvə enerji layihəsinə 1,1 milyard funtluq sərmayəsindən sonra atılıb.
Təklifinizi, şikayətinizi bizə yazın. Sizi dinlərik. 055 634 88 31
