"Microsoft"un qurucusu və texnologiya dünyasının ən nüfuzlu simalarından biri olan Bill Qeytsin 2005-ci ildə verdiyi bir açıqlama, o dövrün simvolu sayılan "Apple iPod"un gələcəyi ilə bağlı diqqətçəkən proqnozlar ehtiva edirdi. Aradan keçən illər bu öncəgörünün nə qədər dəqiq olduğunu sübut etməklə yanaşı, "Microsoft"un hansı böyük fürsəti əldən verdiyini də xatırladır.
HİT.az xəbər verir ki, 2000-ci illərin ortalarında "Apple"ın musiqi pleyeri olan "iPod" hər il milyonlarla satılır, rəqəmsal musiqi dünyasında əsl inqilab yaradırdı. İnsanların musiqiyə olan münasibətini kökündən dəyişən bu cihaz, "Apple"ı da dövrünün ən yenilikçi markalarından birinə çevirmişdi. Lakin 2005-ci ilin may ayında "Frankfurter Allgemeine Zeitung" qəzetinə verdiyi müsahibədə Bill Qeyts "iPod"un bu uğurunun uzunömürlü olmayacağını bildirmişdi. Onun fikrincə, yaxın gələcəkdə daha çoxfunksiyalı cihazlar bu cür yalnız bir məqsədə xidmət edən məhsulları əvəzləyəcəkdi.
Qeytsin vizyonu təkcə "iPod"un sonunu deyil, eyni zamanda mobil texnologiyanın inkişaf istiqamətini də ehtiva edirdi. O, gələcək mobil cihazların yalnız musiqi dinləmək üçün deyil, çoxsaylı funksiyaları yerinə yetirəcək şəkildə inkişaf edəcəyini vurğulamışdı. Hələ "iPhone"un belə təqdim olunmadığı bir dövrdə səsləndirilən bu fikirlər, Qeytsin texnoloji dönüşüm barədə güclü bir intuisiyaya malik olduğunu göstərir.
Bill Qeyts həmin illərdə çıxışlarının birində qeyd etmişdi ki, gələcəkdə mobil cihazlar əsasən proqram təminatı ilə fərqlənəcək və bu, "Microsoft" üçün böyük fürsət deməkdir. Amma sonrakı dövr göstərdi ki, bu fürsətdən "Apple" və "Google" daha effektiv şəkildə yararlandı. Bugünkü mobil dünya "iOS" və "Android" əməliyyat sistemləri üzərində qurulub və hər iki platforma müvafiq olaraq "Apple" və "Google"un nəzarətindədir. "Microsoft"un "Windows Phone" ilə bu bazarda yer tuta bilməməsi isə Qeytsin haqlı olmasına baxmayaraq, bu baxışın öz şirkətinin xeyrinə nəticələnmədiyini ortaya qoydu.
Bununla belə, Qeytsin proqnozları reallıqda öz təsdiqini tapdı. "iPod" zamanla bazardan çəkildi və yerini ağıllı telefonlara verdi. Maraqlı məqam isə odur ki, "iPod"un yerini alan cihaz yenidən "Apple"a məxsus olan "iPhone" oldu. Başqa sözlə, bu keçidi "Apple" özü idarə etdi və "iPod"un dövrünü bitirən də elə öz məhsulu oldu.
Bill Qeyts 2005-ci ildə belə demişdi: “Apple nə qədər yaxşı olsa da, "iPod"un uzun müddət bu mövqeyini qoruyacağını düşünmürəm. Apple bir zamanlar qrafik interfeysə malik "Macintosh" kompüterlərlə öndə idi, amma bu üstünlüyünü itirdi. İstehlakçılar daha çoxunu istəyir və o imkanlara da çatırlar.”
Bu sözlərin bu gün nə qədər mənalı olduğunu görmək mümkündür. İstifadəçilər doğrudan da daha çoxunu istədi. Ağıllı telefonlar musiqi dinləməyin də çox-çox ötəsinə keçərək ünsiyyət, fotoqrafiya, oyun, alış-veriş, iş idarəçiliyi və digər bir çox sahədə əvəzolunmaz vasitəyə çevrildi. "iPod" isə rəqəmsal musiqi dövrünün simvolu olaraq tarixdəki yerini aldı.
"Apple", "iPod"un dövrünü bağlayarkən belə bazarı yönləndirməyə davam etdi. "iPhone" ilə başladığı yeni dövr və "App Store" ekosistemi, istifadəçilərin axtardığı “daha çox imkan”ı tək bir cihazda təqdim edərək Qeytsin işarə etdiyi tələbatı fazlası ilə qarşıladı.
Samir
