Geosiyasi vəziyyət və ABŞ-nin Paris sazişindən çıxması beynəlxalq iqlim hərəkatını dayandırmayacaq.
"Report" xəbər verir ki, bu barədə COP29-un prezidenti Muxtar Babayev “The Astana Times” nəşrinə müsahibəsində bildirib.
"Dünya artıq 2016-2017-ci illərdə bununla üzləşib. Biz bütün ölkələrin qərarlarına hörmət edirik. Bu gün danışıqlar masasında 196 dövlət var. ABŞ mühüm oyunçu, böyük emitent və iqlim layihələrinin maliyyə donorudur. Lakin dünya təkcə bir ölkədən ibarət deyil", - M.Babayev vurğulayıb.
Onun sözlərinə görə, Böyük Britaniya, Çin, Avstraliya və Avropa ölkələri də daxil olmaqla bir çox dövlət iqlim liderliyi mövqelərini gücləndirməyə davam edir. Prioritet, Qlobal Şimal və Qlobal Cənub arasında impulsun qorunması və etimadın dərinləşdirilməsi olmalıdır.
Enerji istehsalçısı olan ölkələrdən danışarkən M.Babayev qeyd edib ki, Azərbaycan və Qazaxıstan kimi ölkələr üçün keçid dövrü yeni imkanlar açır: "Qazaxıstanda artıq alternativ enerji və onun ixracı üzrə layihələr həyata keçirilir. Azərbaycan, Qazaxıstan və Özbəkistan COP29-da Mərkəzi Asiyadan "yaşıl enerji"nin Azərbaycan vasitəsilə dünya bazarına tranziti haqqında saziş imzalayıblar. Bu, şərqdən qərbə böyük enerji dəhlizidir", - o bildirib.
M.Babayevin sözlərinə görə, sentyabrda Tehranda keçiriləcək VII Xəzər sammiti tədbirlərin razılaşdırılması üçün mühüm platforma olacaq.
