BAKI, 1 iyul. TELEQRAF
Asiya İnkişaf Bankı (AİB) tərəfindən "Bakı Metropoliteni" QSC-nin enerji səmərəliliyinin artırılması və təmiz enerji texnologiyalarının tətbiqinə dair texniki yardım layihəsi təklif olunub. AİB-nin "Bakı Metropoliteni" QSC ilə əməkdaşlığı çərçivəsində 2 milyard ABŞ dolları həcmində investisiya proqramının tərkib hissəsi olaraq 1 milyard dollarlıq suveren kredit ayrılamasıplanlaşdırılır.
Teleqraf xəbər verir ki, “Ağıllı və dayanıqlı şəhər nəqliyyatının gələcəyi naminə "Bakı Metropoliteni"nin dekarbonizasiyası” adlı layihənin məqsədi şəhər nəqliyyatının daha ekoloji və səmərəli sistemə çevrilməsinə töhfə verməkdir.
Texniki yardım çərçivəsində metro infrastrukturunun yenilənməsi, enerjiyə qənaət və istismar xərclərinin azaldılması üçün imkanlar qiymətləndiriləcək. Günəş enerjisi və batareya enerjisi saxlama sistemlərinin (BESS) inteqrasiyası, ağıllı enerji idarəetmə sistemləri, qabaqlayıcı texniki xidmət və müasir məlumat analitikası kimi həllərin tətbiqi nəzərdə tutulur.
Layihə məlumat cədvəlində qeyd edilib ki, "Bakı Metropoliteni" QSC aşağı karbonlu, əhatəli və səmərəli şəhər nəqliyyat şəbəkəsinin formalaşdırılmasında mühüm rol oynayır. Bakı ictimai nəqliyyat sisteminin əsas dayağı kimi, şəxsi və avtomobil əsaslı nəqliyyata iqlimə uyğun alternativ təklif edir. 1967-ci ildən fəaliyyət göstərən "Bakı Metropoliteni" QSC 41 kilometr uzunluğunda olan və 27 stansiyanı əhatə edən üç xətt üzrə fəaliyyət göstərir. 2024-cü ildə gündəlik sərnişin sayı təxminən 630 min nəfərə çatıb. Azərbaycanın elektrik enerjisi mənbələrinin hələ də əsasən qalıq yanacaqlara əsaslanması fonunda, 2035-ci ilə qədər gündəlik 1 milyondan çox sərnişinə xidmət etməsi proqnozlaşdırılan metronun artan enerji tələbatı enerji dayanıqlığı baxımından mühüm çağırışlar yaradır.
“Azərbaycan hökuməti metronun beş xəttə və ümumilikdə 120 kilometr uzunluğa, 76 stansiyaya çatdırılması ilə yanaşı, enerji infrastrukturunun əsaslı yenilənməsini dəstəkləmək üçün təqribən 2,5 milyard ABŞ dolları ayırmağı öhdəsinə götürüb. Bu investisiyanın dayanıqlılığını təmin etmək üçün "Bakı Metropoliteni" QSC-yə enerji səmərəliliyi və bərpa olunan enerji inteqrasiyasını prioritet sayan dekarbonizasiya strategiyalarının hazırlanması və həyata keçirilməsi üzrə hədəflənmiş texniki yardıma ehtiyac var.
Ümumilikdə, metrolar avtomobil əsaslı nəqliyyat sistemləri ilə müqayisədə nisbətən az emissiya yaradır, lakin qatarların hərəkəti, işıqlandırma və havalandırma üçün elektrik enerjisi istehlakı kimi əməliyyat emissiyaları onun həyat dövrü ərzindəki ümumi emissiyasının təxminən 35 faizini təşkil edir. "Bakı Metropoliteni" QSC-nin fəaliyyətinin dekarbonizasiyası şirkətin Azərbaycanın iqlim məqsədlərinə — müəyyən edilmiş milli töhfələrinə (NDC) töhfə vermək öhdəliyini nümayiş etdirəcək və tənzimləyici və maliyyə stimulları yaradacaq. Bu, həmçinin "Bakı Metropoliteni" QSC-yə beynəlxalq standartlara və qabaqcıl təcrübələrə uyğunlaşmaqda kömək edəcək. Metronun dekarbonizasiyası həm də biznesin səmərəliliyinin artırılması və əməliyyat xərclərinin azaldılması deməkdir”, – deyə əlavə edilib.
Layihənin icraçısı Azərbaycanın Rəqəmsal İnkişaf və Nəqliyyat Nazirliyi olacaq. Hazırda layihə təklif mərhələsindədir və AİB tərəfindən təsdiqi gözlənilir.
