Bred Pittin rol aldığı film zirvədə: "Apple"dan 144 milyon dollarlıq açılış

"Apple"ın istehsalı olan və Bred Pittin baş rolda oynadığı "F1" filmi dünya üzrə 144 milyon dollarlıq açılış gəliri ilə kassada ilk sıraya yüksəlib. 

Ölkə.az Qaynarinfo-ya istinadən xəbər verir ki, böyük büdcəli bu film eyni həftə vizyona girən güclü rəqiblərini geridə qoymağı bacarıb.

"Apple Original Films" tərəfindən təqdim edilən və idman-dram janrında çəkilən bu film yay mövsümünə güclü bir start verib. "Comscore"un məlumatına görə, film açılış həftəsonunda qlobal səviyyədə 144 milyon dollar, yalnız ABŞ-da isə 55,6 milyon dollar gəlir əldə edib.

"F1" filmi eyni həftə nümayiş etdirilən və maraqla gözlənilən "Əjdahanı necə əhliləşdirmək olar"ın canlı aksiya versiyası ilə "28 il sonra" seriyasının üçüncü filmini geridə qoyaraq liderliyə yüksəlib.

Filmdə Bred Pitt gənc və istedadlı bir "Formula 1" pilotuna mentorluq etmək üçün yarışlara qayıdan təcrübəli sürücü Sonni Heyz obrazını canlandırır. Həyacan və dramı bir arada təqdim edən bu hekayə izləyicilər tərəfindən böyük maraqla qarşılanıb.

İstehsal və marketinq xərcləri təxminən 300 milyon dollara çatan film "Apple" üçün böyük risk kimi qiymətləndirilirdi. Şirkətin daha əvvəl təqdim etdiyi "Argylle" və "Məni Aya uçur" kimi filmlər gözləntiləri qarşılamamışdı. Lakin "F1" filmi bu mənfi tendensiyanı dəyişərək "Apple"ın kino sahəsindəki investisiyalarının nəticə verməyə başladığını göstərib.

Filmin böyük uğuruna baxmayaraq, "Apple" bəzi istifadəçilərini narazı sala biləcək addımlar atıb. İddialara görə, şirkət "F1" filminin reklamını "Wallet" tətbiqi vasitəsilə göstərərək bəzi istifadəçilərdə narahatlıq yaradıb.