“Serp-VS13D” sistemi hal-hazırda “Serp” antidron xəttindəki ən müasir modeldir.
“Poliqon” xəbər verir ki, bunu “Krasnaya Zvezda” qəzetinə müsahibəsində “Vektor” Elmi-Tədqiqat İnstitutunun biznesin inkişafı üzrə direktor müavini Nataliya Kotlyar deyib.
Onun sözlərinə görə, bu sistem “Roselektronika” holdinqinin bir hissəsi olan “Vektor” Elmi Tədqiqat İnstitutu tərəfindən yaradılıb və müasir pilotsuz uçuş aparatlarından (PUA), o cümlədən ən mürəkkəb modellərdən müdafiəni kompleks şəkildə təmin edə bilir.
“Əsas fərqi əhəmiyyətli dərəcədə genişləndirilmiş tezlik diapazonudur. Hazırda biz 13 tezlikdə işləyirik. Bu, bizə geniş idarəetmə diapazonundan istifadə edən və standart elektron müharibə sistemlərinin təsirinə dayanıqlı olan dronlara qarşı belə effektiv mübarizə aparmağa imkan verir. Bundan əlavə, “Serp-VS13D” sadəcə bir “boğucu cihaz” deyil, o, güclü elektron müharibə sistemini və hətta FPV dronlarını aşkarlamağa qadir olan yüksək dəqiqliyə malik detektoru özündə birləşdirən bir kompleksdir”, – deyə N.Kotlyar bildirib.
O əlavə edib ki, sistemin qurulması və sazlanması xüsusi bacarıq tələb etmir. Bundan başqa, əvvəlki nəsil “Serp” sistemləri də ən son versiyaya qədər modernləşdirilə bilər. Bu isə istismarçılar üçün ciddi resurs qənaəti deməkdir.
N.Kotlyar, “Serp” sistemlərinin daha da təkmilləşdiriləcəyini vurğulayıb: “Bu cür sistemlərə tələbat yalnız artacaq. “Serp” seriyasına aid komplekslər sənaye müəssisələrinin və digər obyektlərin müdafiəsində istifadə olunur. Onlar həm stasionar, həm də mobil konfiqurasiyada öz effektivliyini sübut etmişdir”.
