Bakıda "Star Cup Azerbaijan" turnirinin təqdimatı keçirildi - dünya və Avropa çempionu da futbol oynayacaq

Bu gün Bakıda çimərlik futbolu üzrə "Star Cup Azerbaijan" turnirinin rəsmi təqdimat mərasimi baş tutub.

Sportal.az xəbər verir ki, tədbirdə təşkilatçılarla yanaşı, fəxri qonaq qismində yunan-Roma güləşi üzrə dünya və Avropa çempionu, Olimpiya mükafatçısı Rafiq Hüseynov da iştirak edib.

Turnirin təşkilatçılarından biri, idman jurnalisti Ağa Dadaşzadə açılış nitqində çıxış edərək, "Star Cup Azerbaijan"ın ölkəmizdə bu formatda keçirilən ilk çimərlik futbolu turniri olduğunu vurğulayıb. O, layihənin məqsədinin idmanın inkişafına töhfə vermək, həmçinin çimərlik futboluna və ümumilikdə idmana olan marağı artırmaq olduğunu qeyd edib.

Daha sonra söz fəxri qonaq və eyni zamanda turnirdə çıxış edəcək "Platinum" komandasının kapitanı Rafiq Hüseynova verilib. O, bu cür layihələrin idmana marağın yüksəlməsi baxımından mühüm rol oynadığını bildirib və turnirin yüksək səviyyədə təşkil olunacağına əminliyini ifadə edib.

AFFA və Su İdmanı Sarayının dəstəyi ilə keçiriləcək turnirdə ulduzlardan ibarət 4 komanda iştirak edəcək. Qarşılaşmalar 26 və 28 iyun tarixlərində saat 20:00-da baş tutacaq, final oyunu və üçüncülük uğrunda isə isə 2 iyulda saat 19:00-dan etibarən keçiriləcək. Matçlar Su İdmanı Sarayının ərazisində yerləşən Avropa Oyunları Parkında oynanılacaq. 

Qeyd edək ki, bütün oyunlara giriş sərbəstdir.

saytlarin hazirlanmasi