Qaynarinfo portalından verilən məlumata əsasən, ain.az bildirir.
İtaliya hökuməti Rusiya Federasiyasının Ukraynaya qarşı genişmiqyaslı müdaxiləsindən sonra rus oliqarxlarına məxsus aktivləri dondurmaqda davam edir. Bu günə qədər dondurulmuş aktivlərin ümumi dəyəri təxminən 2,3 milyard avro (təxminən 2,64 milyard ABŞ dolları) təşkil edir. Son müsadirələr iyun ayının əvvəlində həyata keçirilib.
Qaynarinfo xəbər verir ki, bu barədə "Reuters" agentliyi məlumat yayıb.
Bildirilib ki, Avropa İttifaqının Rusiyaya və onun tərəfdarlarına qarşı tətbiq etdiyi sanksiyalar çərçivəsində İtaliya bank hesablarını, dəbdəbəli villaları, yaxtaları və avtomobilləri dondurub. 2023-cü ilin iyun ayının sonuna qədər bu aktivlərin dəyəri 2,5 milyard dollara yaxındır.
2024-cü ilin dekabrında İtaliya hökuməti daha 280 milyon avro (321 milyon dollar) dəyərində rus aktivlərini dondurub. Bu məbləğ əvvəlki illə müqayisədə 44 milyon avro (50,45 milyon dollar) çoxdur.
İyun ayının əvvəlində isə İtaliyanın vergi polisi Milan şəhərində yerləşən və İrana məxsus olan "Irital Shipping Lines" şirkətinə aid, ümumi dəyəri 1 milyon avrodan (1,15 milyon dollar) çox olan iki daşınmaz əmlakı dondurub. Səbəb kimi bu şirkətin İranın Rusiya-Ukrayna müharibəsindəki hərbi dəstəyini təmsil etməsi göstərilib.
İtaliya İqtisadiyyat və Maliyyə Nazirliyinin Dövlət Əmlakı Agentliyi Avropa İttifaqının sanksiyaları nəticəsində dondurulmuş likvid olmayan aktivlərə nəzarət edir. Dondurma müddətində bu aktivlərin idarə olunması ilə bağlı bütün xərcləri İtaliya dövləti qarşılayır. Rəsmi məlumatlara görə, 2024-cü ilin fevralına qədər bu xərclər 31,7 milyon avro (36,37 milyon dollar) təşkil edib.
Agentlik əlavə edib ki, Aİ ya bu aktivləri müsadirə edə, ya da sahiblərinə qaytara bilər – sonuncu halda sahibkarlar aktivlərin saxlanılması üçün çəkilən xərcləri ödəməlidirlər.
Bundan başqa, "Politico" nəşri Avropa rəsmilərinə istinadla bildirib ki, Avropa İttifaqı dondurulmuş rus aktivlərinin bir hissəsini daha riskli investisiya fonduna yönəltməyi planlaşdırır. Bu fondun daha yüksək faiz gəlirləri verəcəyi və Ukrayna iqtisadiyyatının dəstəklənməsinə töhfə verməsi gözlənilir.
Aydın
Hadisənin gedişatını izləmək üçün ain.az saytında ən son yeniliklərə baxın.
