Suriyada kilsəyə intihar hücumu zamanı azı 20 nəfər ölüb, 50-dən çox insan yaralanıb
Suriyanın Dəməşq şəhəri yaxınlığındakı Dveil’a bölgəsində yerləşən Mar Elias kilsəsində intiharçı tərəfindən həyata keçirilən hücum nəticəsində azı 20 nəfər ölüb, 50-dən çox insan isə yaralanıb. Bu barədə Suriya Səhiyyə Nazirliyi və təhlükəsizlik orqanları məlumat yayıb.
Partlayış bazar günü ayin zamanı, kilsədə ibadət edən insanların arasında baş verib. Hücumun məsuliyyətini hələlik heç bir qruplaşma üzərinə götürməsə də, Suriya Daxili İşlər Nazirliyi intiharçının İŞİD (ISIL) qruplaşmasının silahlısı olduğunu və partlayışdan əvvəl kilsəyə daxil olaraq insanlara atəş açdığını bildirib. Bu versiya bəzi şahidlərin ifadələri ilə üst-üstə düşür.
Qeyd olunur ki, hadisə nəticəsində yaralananlardan bəzilərinin vəziyyəti ağırdır. Dövlətə məxsus SANA agentliyi Səhiyyə Nazirliyinə istinadla bildirir ki, yaralananların sayı 50-dən çoxdur. Yerli media isə ölənlər arasında uşaqların da olduğunu yazır.
“Suriyanın Mülki Müdafiə” təşkilatının Telegram vasitəsilə yaydığı bəyanata görə, xilasedici qruplar hadisə yerindən hələ də meyitləri çıxarmağa davam edir və açıqlanan rəqəmlər ilkin xarakter daşıyır.
Qeyd edək ki, bu hücum Suriyada dini obyektə qarşı son illərdə törədilən ilk genişmiqyaslı intihar hücumu kimi qiymətləndirilir. Hadisə, ölkədə 14 ilə yaxın davam edən və yüz minlərlə insanın həyatına son qoyan və milyonları köçkünə çevirən vətəndaş müharibəsindən sonra nisbi sabitlik dövrünə qədəm qoyulduğu bir vaxtda baş verib.
Hücum, həmçinin yanvar ayında hakimiyyətə gəlmiş prezident Əhməd əl-Şəraa rəhbərliyindəki müvəqqəti hökumətin azlıqların dəstəyini qazanmağa çalışdığı bir dövrə təsadüf edir. Ölkədə İŞİD kimi ekstremist qruplaşmaların yatmış hüceyrələrinin mövcudluğu ilə bağlı narahatlıqlar da artmaqdadır.
Qeyd edək ki, Prezident əl-Şəraa dövründə Suriya beynəlxalq aləmlə münasibətlərin bərpası istiqamətində ciddi irəliləyişlər əldə edib. ABŞ və Avropa İttifaqı keçmiş prezident Bəşər Əsəd dövrünə aid sanksiyaları bu ilin əvvəlində ləğv etmişdi.
