Azərbaycanda heyvanların sağlamlığını izləyən “ağıllı tasma” məhsulu hazırlanıb. Bunu Kənd Təsərrüfatı Nazirliyinin Aqrar İnnovasiya Mərkəzinin direktoru Anar Cəfərov bildirib. O, qeyd edib ki, bu yaxınlarda Zəngilanın Ağalı kəndində "bootcamp" təşkil edilib:
"Bu “bootcamp”ların əsas məqsədi Azərbaycanın aparıcı universitetlərində süni intellekt, kompyuter mühəndisliyi, mekatronika kimi ixtisaslarda təhsil alan tələbələri aqrar sahədə fəaliyyət göstərən iri aqroparklarla bir araya gətirməkdir. Artıq bir neçə uğurlu layihənin şahidi olmuşuq. Məsələn, “ağıllı tasma” layihəsini qeyd edə bilərəm. Bu layihəni Zaqataladan olan bir startapçı hazırlayıb, iribuynuzlu heyvanların boynuna taxıla bilən qurğudur. Bu cihaz heyvanın nəbzini, stress səviyyəsini, bədəndəki dəyişiklikləri qeydə alaraq mərkəzə ötürür. Eyni zamanda, heyvanlar vəhşi heyvanlarla qarşılaşdıqda xüsusi səslər çıxarır və bu səslər sayəsində vəhşi heyvanlar uzaqlaşır. "Dost Aqropark"da analoji cihazlardan istifadə edilir. Onların istifadə etdikləri cihazlar Polşa və Türkiyə istehsalıdır. Lakin yerli istehsal olan bu cihaz onlarda maraq yaratdı”.
Bəs, "ağıllı tasma" nədir, necə işləyir?
AzNews.az bu suala cavab axtarıb. Məlum olub ki, "Ağıllı tasma "iribuynuzlu heyvanların sağlamlığını izləmək üçün hazırlanmış innovativ cihazdır. Bu texnologiya heyvanların sağlamlıq göstəricilərini davamlı şəkildə izləməklə aqrar sektorda fəaliyyət göstərən fermerlər və aqroparklar üçün mühüm üstünlüklər təmin edir.
Ağıllı tasma heyvanın boynuna taxılır və bu cihaz vasitəsilə heyvanın müxtəlif bioloji göstəriciləri izlənir:
Nəbz: Heyvanın ürək döyüntülərinin ritmini ölçərək onun sağlamlıq vəziyyətini dəyərləndirir.
Stress səviyyəsi: Heyvanın stressə məruz qalma ehtimalını müəyyən edir.
Bədəndə dəyişikliklər: Temperatur və digər dəyişiklikləri izləyərək heyvanın sağlamlıq vəziyyətindəki anormallıqları vaxtında aşkar edir.
Toplanan bütün məlumatlar real vaxtda mərkəzi sistemə ötürülür. Bu, fermerlərə heyvanlarının vəziyyətini daima nəzarətdə saxlamağa və lazımi tədbirləri vaxtında görməyə imkan yaradır.
Cihaz heyvanın vəhşi heyvanlarla qarşılaşdığı halları da müəyyən edə bilir.
