İrlandiya kömürlə işləyən sonuncu elektrik stansiyasını rəsmən bağlayıb və kömürlə elektrik enerjisi istehsalı dövrünü başa vurub.
HİT.az xəbər verir ki, bu barədə "Bloomberg" məlumat yayıb.
ESB dövlət şirkətinin bildirdiyinə görə, ölkədəki sonuncu kömürlə işləyən elektrik stansiyası 40 ildən çox fəaliyyət göstərdikdən sonra "County Clare"də rəsmi olaraq bağlanıb.
"Bu, İrlandiyada kömür dövrünün sonu və daha təmiz enerji gələcəyinin başlanğıcıdır", deyə ESB baş direktoru Paddi Hayes bildirib.
Onun sözlərinə görə, İrlandiya artıq bu yanacaq növündən tamamilə imtina edən Böyük Britaniyadan nümunə götürür.
Qeyd edilir ki, İrlandiyanın kömürlə işləyən “Moneypoint” elektrik stansiyası 2029-cu ilə qədər ehtiyat rejimində qalacaq, fövqəladə və ya gözlənilməz çatışmazlıq halında o, mazutla yenidən işə salına bilər. Eyni zamanda, o, artıq enerji keçidinin yeni şərtlərinə uyğunlaşır - 2022-ci ildə burada İrlandiyanın ilk sinxron kompensatoru işə salınıb. Bu cihaz bərpa olunan enerji mənbələrinin üstünlük təşkil etdiyi şəraitdə şəbəkəyə ətalət və tezliyi sabitləşdirməyə kömək edir.
"Həmçinin bu il İtaliya iki böyük kömür zavodunu bağlayacaq və İspaniyada qalanlar istismardan çıxarılacaq və ya qaza çevriləcək", deyə "Beyond Fossil Fuels" qeyri-kommersiya təşkilatı bildirir.
Bu proseslər Avropada bərpa olunan enerjiyə daha geniş keçidin bir hissəsidir. Analitiklərin fikrincə, son on ildə qitədə kömürdən istifadə demək olar ki, iki dəfə azalıb. Baxmayaraq ki, hələ 2013-cü ildə kömür Avropanın enerji balansında ən böyük paya sahib idi.
İrlandiyada bu keçidə böyük ölçüdə külək enerjisinin sürətli artımı kömək edib – o, hazırda ölkənin elektrik enerjisinə olan tələbatının üçdə birindən çoxunu təmin edir. Bununla belə, ətraf mühitin mühafizəsi təşkilatları yeni çağırışlar barədə xəbərdarlıq edir - xüsusən, qazdan asılılıq və məlumat mərkəzlərinin genişləndirilməsi enerjinin çevikliyi və saxlanmasının inkişafına sərmayə qoymasa, ölkənin iqlim məqsədlərinə çatmasına mane ola bilər.
Samir
