İsrailin İran ərazisinə endirdiyi son hava zərbələri təkcə Tehranın nüvə proqramını ləngitmək məqsədi daşımır.
Musavat.com xəbər verir ki, bu barədə Reuters agentliyi təhlil yazısı dərc edib.
Yazıda qeyd olunur:
"Hücumların miqyası, hədəflərin seçimi və İsrail rəsmilərinin açıqlamaları daha uzaqgörən və fundamental bir məqsədə – İran rejiminin devrilməsinə işarə edir.
Cümə günü səhər saatlarında həyata keçirilən zərbələr yalnız nüvə obyektlərini və raket istehsalı müəssisələrini deyil, həmçinin İranın hərbi komandanlığında əsas rol oynayan şəxsləri və nüvə alimlərini də hədəfə alıb. Ekspertlərə görə, bu zərbələr İran hakimiyyətinin daxildəki və regiondakı nüfuzunu zəiflətmək, ölkə daxilində narazılığı artırmaq üçün planlanıb – bu isə nəticə etibarilə rejim dəyişikliyi ssenarisinə zəmin yarada bilər.
Vaşinqtondakı Yaxın Şərq Siyasəti İnstitutunun eksperti, sabiq prezident Corc Buş administrasiyasında çalışmış Maykl Sinqh məsələ ilə bağlı bildirib: “İsrailin bu addımı atmasının səbəblərindən biri rejim dəyişikliyinə ümid etməsidir. Onlar iranlı xalqın ayağa qalxmasını istəyir”.
O əlavə edib ki, ilkin mərhələdə mülki itkilərin azlığı da İsrailin bu hədəfi – xalqı rejimə qarşı çevirmək planını nəzərə aldığını göstərir.
İsrail Baş naziri Benyamin Netanyahunun hücumların ilk saatlarında yayımladığı videomüraciət isə bu niyyətləri açıq şəkildə ortaya qoyub. O, İran xalqına birbaşa səslənərək deyib:
“Demək olar ki, 50 ildir sizə zülm edən İslam rejimi bizim – İsrail Dövlətinin – məhvinə çalışır”.
Analitiklər bildirirlər ki, əgər bu hücumlar davam edərsə və daxildə sosial-siyasi təlatümlərə yol açarsa, İsrailin gizli və strateji məqsədi olan rejim dəyişikliyi ssenarisi daha açıq şəkildə üzə çıxa bilər.
Musavat.com
