Azpolitika.az saytına istinadən ain.az xəbər verir.
Avropa İttifaq (Aİ) Şurası Krımın ilhaqına görə Rusiyaya qarşı tətbiq etdiyi sanksiyaların müddətini daha bir il uzadıb.
Məhdudiyyətlər 2014-cü ilin iyununda tətbiq edilib və ilhaq edilmiş Krımda istehsal olunan məhsulların Aİ-yə idxalına qadağa da bura daxildir. Həmçinin Krımda infrastruktur və ya maliyyə investisiyalarına və turizm xidmətlərinin göstərilməsinə qadağa qoyulub.
Bundan əlavə, müəyyən mal və texnologiyaların Krım şirkətlərinə ixracına və ya Krımda istifadəyə, xüsusən də nəqliyyat və enerji sektorlarında, həmçinin neft, qaz və faydalı qazıntıların kəşfiyyatı və çıxarılmasına məhdudiyyətlər qoyulub.
“Aİ Rusiya Federasiyası tərəfindən Krımın və Sevastopolun qanunsuz ilhaqını beynəlxalq hüququn pozulması kimi tanıyır və pisləməkdə davam edir”, - press-relizdə deyilir.
Rusiya Krımı 2014-cü ildə Ukrayna qanunlarına zidd olaraq keçirilən referendumdan və Rusiya ordusunun yarımadaya nəzarəti ələ keçirməsindən sonra ilhaq edib. Qərb ölkələri bunu beynəlxalq hüququn pozulması hesab edir. Moskva yarımadanın ilhaqını “tarixi ədalətin bərpası” adlandırır.
“AzPolitika.info”
Ən son xəbərləri və yenilikləri almaq üçün ain.az saytını izləyin.
