Xəbər verdiyimiz kimi, Azərbaycanda bəzi sosial müavinət və təqaüdlərin məbləği artırılıb. Mütəxəssislər bu addımların davamlı olacağını istisna etmir. Hazırda əməkhaqqı və pensiyaların da yüksəldilməsi ilə bağlı müzakirələr aparılır.
News24.az xəbər verir ki, globalinfo.az-a danışan iqtisadçı Pərviz Heydərov deyib ki, gələn aydan qüvvəyə minəcək artımlar 5-ci sosial islahat paketinin ikinci mərhələsi çərçivəsində həyata keçirilir:
“Aprel ayından etibarən, bunun olacağı gözlənilirdi. Çünki ölkə başçısı Nazirlər Kabinetinə bu istiqamətdə təkliflərin hazırlanması üçün 3 ay vaxt vermişdi. Müavinət və təqaüdlərin artırılmasından öncə isə minimum əməkhaqqı və pensiya məbləği yüksəldilmişdi. Eyni zamanda, bəzi büdcə təşkilatlarında maaş artımları da həyata keçirildi. İyul ayında tətbiq olunacaq artımlar məhz bu paket çərçivəsində son mərhələdir. Cari il ərzində bundan əlavə yeni artımlar gözlənilmir”.
İqtisadçı bildirib ki, sosial islahatlar mərhələli şəkildə həyata keçirilir və gələcəkdə oxşar addımların atılması planlaşdırılır:
“Sosial xərclərin artırılması hökumətin prioritet istiqamətlərindən biridir. İqtisadiyyat inkişaf etdikcə, zaman dəyişdikcə və əhalinin sayı artdıqca tələbat da yüksəlir. Həmçinin inflyasiya sürətlənir. Bu baxımdan əhalinin sosial rifahının qorunması üçün mütəmadi artımlar qaçılmaz zərurətə çevrilir”.
