Heydər Əliyev adı Azərbaycan tarixində silinməz izlər qoymuş, ölkəsinin müstəqilliyini möhkəmləndirən, inkişafının əsasını qoyan dahi bir şəxsiyyətdir.
O, sadəcə bir siyasətçi deyil, çətin zamanlarda xalqına liderlik edən, onu uçurumdan xilas edən və gələcəyə aparan bir xilaskar, müasir Azərbaycan dövlətinin memarıdır.
Heydər Əliyevin Azərbaycana rəhbərlik etdiyi dövrlər ölkənin ən çətin və keşməkeşli anlarına təsadüf edib. Xüsusilə, 1993-cü ildə Azərbaycanın müstəqilliyi böyük təhdidlər altında idi. Ölkədə siyasi sabitlik yox idi, cəbhədə vəziyyət ağır idi, daxili çəkişmələr isə dövlətçiliyin mövcudluğunu sual altına alırdı. Məhz belə bir kritik məqamda xalqın təkidli tələbi ilə hakimiyyətə qayıdan Heydər Əliyev öz müdrik siyasəti və uzaqgörən qərarları ilə ölkəni parçalanmaqdan xilas etdi. Onun qətiyyəti və liderlik bacarığı sayəsində ölkədə vətəndaş müharibəsinin qarşısı alındı, siyasi sabitlik bərpa edildi. Bu səbəbdən Heydər Əliyev haqlı olaraq Azərbaycan xalqının xilaskarı adını qazandı.
Xilaskarlıq missiyası ilə yanaşı, Heydər Əliyev müstəqil Azərbaycan dövlətinin möhkəm təməllərini qoydu. Onun rəhbərliyi altında Azərbaycan beynəlxalq aləmdə öz layiqli yerini tutdu, iqtisadi islahatlar həyata keçirildi, neft strategiyası işlənib hazırlandı və “Əsrin müqaviləsi” imzalandı. Bu müqavilə Azərbaycanın iqtisadi müstəqilliyinin və gələcək inkişafının əsasını qoydu. Həmçinin, hüquqi dövlət quruculuğu istiqamətində mühüm addımlar atıldı, ilk Konstitusiya qəbul edildi və demokratik institutlar formalaşdırıldı.
Heydər Əliyevin milli ideologiyamızın – Azərbaycançılığın formalaşmasında və inkişafında müstəsna rolu olub. O, azərbaycanlıların milli kimliklərini qoruyub saxlamaları və birləşmələri üçün böyük səy göstərdi. Onun qurduğu siyasi sistem və inkişaf strategiyası bu gün də Azərbaycanın müstəqilliyinin və tərəqqisinin təminatıdır.
Heydər Əliyevin Azərbaycan qarşısındakı xidmətləri əvəzsizdir. O, çətin anlarda xalqına rəhbərlik edən, onu uçurumdan qurtaran və gələcəyə aparan bir lider kimi yaddaşlarda qalıb. Onun irsi bu gün də yaşayır və Azərbaycanın gələcək nəsilləri üçün yol göstərən bir mayak rolunu oynayır. Heydər Əliyev təkcə Azərbaycanın deyil, bütövlükdə regionun və dünyanın görkəmli siyasi xadimlərindən biri kimi tarixə düşüb. Onun adı hər zaman Azərbaycanın müstəqilliyi, inkişafı və tərəqqisi ilə birlikdə anılacaq.
Arzuman Muradlı
Politoloq
