İyunun 14-də Mil-Muğan Regional Təhsil İdarəsinin tabeliyində fəaliyyət göstərən ümumtəhsil məktəblərində məzunlar üçün “Son zəng” çalınıb.
Ucnoqta.az xəbər verir ki, “Son zəng” tədbirlərində elm və təhsil nazirinin müşaviri Rüstəm Ağayev, ARTİ-nin direktor müavini Kənan Kərimli, Mil-Muğan RTİ-nin müdiri Bəhruz Nəbili, müdir müavini Rabil Şahbazov, Mil-Muğan RTİ-nin struktur bölmə rəhbərləri, məzunlar, valideyn icmalarının nümayəndələri və müəllimlər iştirak ediblər.
Tədbirlərdə məktəb məzunlarının iştirakı ilə kompozisiyalar və maraqlı proqram nümayiş olunub.
Dərs ilini müvəffəqiyyətlə başa vuran şagirdlər Fəxri fərman və diplomlarla təltif olunublar.
“Son zəng” tədbiri hər bir ümumtəhsil məktəbinin həyətyanı sahəsində, həyətyanı sahəsi olmayan ümumi təhsil müəssisələrinin idman və ya akt zallarında təşkil olunub.
Qeyd edək ki, 2024-2025-ci tədris ilində Mil-Muğan RTİ-nin tabeliyindəki ümumtəhsil məktəblərinin I siniflərini 5913, IX siniflərini 7107, XI siniflərini isə 4594 nəfər şagird başa vurub.
