"Boşanmaların artması faktı Azərbaycan cəmiyyətində ailə institutunun qarşılaşdığı problemləri aydın şəkildə ortaya qoyur. Son illərin statistik göstəriciləri bu prosesin mənfi dinamika ilə inkişaf etdiyini və artıq ciddi sosial tendensiyaya çevrildiyini göstərir. Bu mənada, boşanmaların artması təsadüfi hadisə kimi deyil, daha çox sistemli sosial dəyişikliklərin nəticəsi kimi qiymətləndirilir. Bəzi mütəxəssislər bu tendensiyanı qlobal proseslərin fonunda izah edirlər və qeyd edirlər ki, bu dəyişikliklər müəyyən hallarda geri dönüşü çətin olan xarakter alır. Azərbaycanda da ekspertlərin bir qismi problemin həlli yollarından çox, onun formalaşmasına təsir edən amilləri təhlil etməyə üstünlük verir. Bu isə məsələnin kompleks və çoxşaxəli mahiyyətindən irəli gəlir. Qloballaşma, texnoloji inkişaf, sosial şəbəkələrin təsiri və informasiya axınının artması cəmiyyətdə dəyərlərin transformasiyasına səbəb olur. Nəticədə ailə münasibətlərində ənənəvi modeldən daha fərdi yanaşmalara keçid müşahidə edilir".
Bu fikirləri Aznews.az-a açıqlamasında sosioloq Naib Niftəliyev deyib.
Qeyd edək ki, son illərdə Azərbaycanda boşanmaların sayının artması cəmiyyətdə geniş müzakirə olunan sosial məsələlərdən birinə çevrilib. Rəsmi statistik göstəricilər nikahların davamlılığı ilə bağlı müəyyən problemlərin mövcud olduğunu göstərir. Mütəxəssislər boşanmaların artmasını iqtisadi çətinliklər, ailədaxili münasibətlərdə dəyişikliklər, sosial şəbəkələrin təsiri, fərdi azadlıqlara baxışın dəyişməsi və digər amillərlə əlaqələndirirlər.
Sosioloq qeyd edib ki, bu dəyişikliklər bir tərəfdən sosial modernləşmə kimi qiymətləndirilsə də, digər tərəfdən ailə institutunun zəifləməsi kimi də dəyərləndirilir.
