Unikal.az saytından əldə olunan məlumata görə, ain.az məlumat yayır.
"Bugünkü tədbir təkcə elmi fikir mübadiləsi üçün bir platforma deyil, həm də gələcəyimizin necə formalaşacağını birlikdə müzakirə etmək üçün fürsətdir. Dünyamız sürətlə dəyişir və bu dəyişikliklər fonunda həm məsuliyyətlərimiz, həm də imkanlarımız artır".
"Unikal" xəbər verir ki, bunu deputat Samir Vəliyev “Ağıllı ətraf mühit və yaşıl texnologiyalar – 2026” beynəlxalq elmi konfransın açılış mərasimində çıxışı zamanı deyib.
O bildirib ki, iqlim dəyişikliyi, enerji resurslarının tükənməsi, hava və su çirklənməsi, eləcə də tullantıların idarə olunması kimi problemlər artıq yalnız ekoloji məsələlər deyil:
"Bunlar iqtisadi inkişafı, insan sağlamlığını və gələcək nəsillərin həyat keyfiyyətinə birbaşa təsir edən qlobal çağırışlardır. Buna görə də ağıllı mühitlər və yaşıl texnologiyalar müasir dünyanın ən vacib inkişaf istiqamətlərindən birinə çevrilib. “Ağıllı mühit” anlayışı texnologiya, insan və təbiət arasında daha balanslı bir əlaqənin qurulmasını hədəfləyir. Sensor sistemləri, süni intellekt, böyük verilənlər, ağıllı şəhərlər, enerji idarəetmə sistemləri və rəqəmsal monitorinq texnologiyaları artıq gündəlik həyatımızın ayrılmaz hissəsinə çevrilməkdədir. Məqsəd təkcə texnoloji inkişaf deyil, həm də resurslardan səmərəli istifadə, tullantıların azaldılması və ekoloji davamlılığın təmin edilməsidir.
Yaşıl texnologiyalar bu transformasiyanın əsas hərəkətverici qüvvəsidir. Günəş və külək enerjisi, elektrik nəqliyyatı, ekoloji tikinti materialları, suyun təkrar emalı sistemləri və karbon emissiyalarının azaldılmasına yönəlmiş innovasiyalar inkişafla ətraf mühitin qorunmasının bir-birinə zidd anlayışlar olmadığını göstərir. Əksinə, düzgün yanaşma ilə bu iki istiqamət bir-birini tamamlayır və gücləndirir".
Deputat qeyd edib ki, bu konfransın əhəmiyyəti müxtəlif sahələrin nümayəndələrini — alimləri, mühəndisləri, sahibkarları, dövlət rəsmilərini və gənc tədqiqatçıları bir araya gətirməsindədir:
"Ekoloji problemlər tək bir sektor tərəfindən həll oluna bilməz. Onlar əməkdaşlıq, innovasiya və ortaq məsuliyyət tələb edir. Xüsusilə sevindirici haldır ki, bu sahəyə gənclərin marağı artır. Çünki gələcəyin yaşıl iqtisadiyyatı və ağıllı şəhərləri onların ideyaları və təşəbbüsləri üzərində qurulacaq. Bu gün burada aparılan müzakirələr, layihələr və qurulan əlaqələr sabah daha dayanıqlı bir dünyanın formalaşmasına töhfə verə bilər.
Azərbaycan yaşıl enerji və davamlı inkişaf istiqamətində mühüm addımlar atır. Qarabağ və Şərqi Zəngəzurun yaşıl enerji zonası elan edilməsi, bərpa olunan enerji layihələrinin genişləndirilməsi və rəqəmsal transformasiya təşəbbüsləri ölkənin bu sahədə strateji baxışını nümayiş etdirir. Bu təşəbbüslər təkcə region üçün deyil, həm də beynəlxalq əməkdaşlıq üçün əhəmiyyətlidir".
"Bu gün biz burada yalnız problemləri müzakirə etmək üçün deyil, həm də birlikdə həll yolları formalaşdırmaq üçün toplaşmışıq. Elm və texnologiyanın gücü, insan yaradıcılığı və beynəlxalq əməkdaşlıq sayəsində daha təmiz, daha təhlükəsiz və daha yaşıl bir gələcək qurmaq mümkündür.
İnanıram ki, bu konfrans yeni ideyaların, dəyərli tərəfdaşlıqların və innovativ layihələrin yaranmasına mühüm töhfə verəcək. Ümid edirəm ki, burada aparılan müzakirələr gələcəyimiz üçün praktik və davamlı nəticələrə gətirib çıxaracaq".
Anar Kəlbiyev
Hadisənin gedişatını izləmək üçün ain.az saytında ən son yeniliklərə baxın.
