Tehranın bu müddətdə Hörmüz boğazını tam açacağı iddia edilir...
Poliqon xəbər verir ki, Nikkei nəşri İran və ABŞ arasında mövcud atəşkəs rejiminin böyük ehtimalla daha 60 gün müddətinə uzadılacağını iddia edib. Nəşrin məlumatına görə, tərəflər arasında gərginliyin azaldılması və regionda sabitliyin qorunması istiqamətində diplomatik səylər davam edir.
Məqalədə bildirilir ki, atəşkəs dövründə İranın Hörmüz boğazı ətrafında minalardan təmizləmə işləri aparacağı və boğazın tam şəkildə yenidən açılacağı gözlənilir. İddiaya əsasən, boğazdan keçən beynəlxalq gəmiçilik və enerji daşımalarının müharibədən əvvəlki dövrdə olduğu kimi sərbəst şəkildə bərpa olunacağı ehtimal edilir.
Nikkei qeyd edir ki, Hörmüz boğazının tam fəaliyyətə qayıtması qlobal enerji bazarları və beynəlxalq logistika marşrutları üçün mühüm əhəmiyyət daşıyır. Dünyada neft ticarətinin böyük hissəsinin bu strateji keçid nöqtəsindən həyata keçirilməsi səbəbindən bölgədə sabitliyin təmin olunması beynəlxalq bazarlara da birbaşa təsir göstərir.
Bununla belə, nə Tehran, nə də Vaşinqton tərəfindən atəşkəsin uzadılması və ya Hörmüz boğazının açılması ilə bağlı məlumatlara dair rəsmi təsdiq verilməyib. Nəşrin yaydığı məlumat hələlik tərəflərin rəsmi açıqlamaları ilə təsdiqlənməyən iddia kimi qiymətləndirilir.
Poliqon.info
