Ajans.az xəbər verir ki, bu barədə “The Indian Express” məlumat yayıb. Hadisə 22 may tarixində Çandrapur rayonunda baş verib. Məlumata görə, 13 qadından ibarət qrup meşə ərazisində yarpaq yığarkən pələng və onun balalarının hücumuna məruz qalıb. Onlardan doqquzu qaçaraq xilas ola bilib, dörd qadın isə həyatını itirib. Bildirilir ki, bu, cari il ərzində həmin rayonda baş verən yeddinci ölümcül pələng hücumudur. Yerli meşə təsərrüfatı rəsmiləri Brahmapur kəndinin meşə massivinə yaxın ərazidə yerləşdiyini və ərazidə bir pələng və üç baladan ibarət heyvan qrupunun müşahidə olunduğunu açıqlayıblar. Sakinlərə müvəqqəti olaraq meşəyə daxil olmamaq barədə xəbərdarlıq edilib.
Hadisədən sonra hər bir qurbanın ailəsinə 25 min rupi məbləğində təcili yardım ayrılıb. Eyni zamanda ərazidə təhlükəsizliyi gücləndirmək məqsədilə müşahidə kameraları və kamera tələləri quraşdırılıb.
