BAKI, 24 may. TELEQRAF
Tbilisidə Gürcüstanın Dövlət Təhlükəsizliyi Xidmətinin yeni rəisi və Azərbaycan Respublikasının fövqəladə və səlahiyyətli səfiri arasında rəsmi görüş keçirilib.
Teleqraf xəbər verir ki, Gürcüstan Dövlət Təhlükəsizliyi Xidmətinin (DTX) yaydığı rəsmi məlumata görə, qurumun rəhbəri Qeka Qeladze Azərbaycanın bu ölkədəki səfiri Faiq Quliyevi qəbul edib.
Görüş zamanı tərəflər Azərbaycan ilə Gürcüstan arasında mövcud olan strateji tərəfdaşlıq münasibətlərini və təhlükəsizlik sahəsində ikitərəfli əməkdaşlığın əsas prioritet istiqamətlərini geniş şəkildə müzakirə ediblər.
Söhbət zamanı, həmçinin regionda yaranan yeni çağırışlar, regional sabitlik və təhlükəsizliyin birgə təmin edilməsi məsələləri ətrafında fikir mübadiləsi aparılıb. Qeka Qeladze iki qonşu ölkənin təhlükəsizlik orqanları arasında mövcud olan möhkəm və etibarlı əməkdaşlığın xüsusi əhəmiyyətini vurğulayıb, bu tərəfdaşlığın daha da dərinləşdirilməsi üçün tam hazır olduqlarını ifadə edib.
Azərbaycan səfiri Faiq Quliyev Dövlət Təhlükəsizliyi Xidmətinin rəhbərini bu məsuliyyətli vəzifəyə təyin olunması münasibətilə təbrik edib və gələcək fəaliyyətində ona uğurlar arzulayıb.
