...Yüzlərlə dron Moskvaya hücum etdikcə və Rusiya iqtisadiyyatı müharibənin təzyiqi altında çökdükcə cəsarət və saxta özünəinam qorxuya yol verir.
SİA-nın əldə etdiyi məlumata görə, bu barədə The Telegraph yazır.Moskvada əhval-ruhiyyə kəskin şəkildə dəyişir. Cəmi bir il əvvəl Rusiya paytaxtı sabitlik hissi ilə yaşayırdı və müharibənin təsirlərini çətinliklə hiss edirdisə, indi qorxu və yorğunluq yeni reallığa çevrilir.
Ukraynanın Moskvaya genişmiqyaslı dron hücumlarından sonra sakinlər ilk dəfə kütləvi şəkildə müharibənin artıq “uzaq bir yerdə” olmadığını hiss ediblər.
Aeroportlara, neft anbarlarına və yaşayış məntəqələrinə edilən zərbələr əvvəllər hadisələri görməməzliyə vuranlarda belə narahatlıq yaradıb.
Bir çox moskvalı ilk dəfə şəxsi təhlükə hiss etdiklərini etiraf edir. Rusiyanın hücumu yavaşlayır, iqtisadiyyat sürətini itirir və işçi qüvvəsi çatışmazlığı rekord səviyyələrə çatır. Analitiklər kütləvi mühacirət və cəbhədə böyük itkilərdən sonra ölkədə milyonlarla işçi çatışmazlığı olduğunu təxmin edirlər.
İqtisadçılar xəbərdarlıq edirlər ki, hərbi xərclər artıq vəziyyəti xilas etmək üçün kifayət deyil.
Mərkəzi Bank yüksək faiz dərəcələrini qoruyur, biznes durğunluq içindədir və müdafiə sektorundan kənarda getdikcə daha çox şirkət istehsalı azaldır və işçilərini yarımştat işə keçirir. Bu fonda ekspertlər hesab edirlər ki, Putin tezliklə çətin bir seçimlə qarşılaşacaq: ya müharibəni tədricən dayandırmalı, ya da Rusiyanı daha sərt səfərbərlik yoluna keçirməlidir.
Bu, təkcə yeni bir çağırış dalğası ilə deyil, həm də iqtisadiyyat üzərində nəzarətin artması, azadlıqların məhdudlaşdırılması və cəmiyyətə təzyiqlə sovet idarəetmə modelinə faktiki olaraq qayıtmaqla bağlıdır.
Rusiyanın özündə bu yaxınlara qədər demək olar ki, tabu olan sözlər getdikcə daha çox eşidilir: insanlar sadəcə müharibənin bitməsini istəyirlər.
Əli Babayev
