İkiqat olimpiya çempionu, məşhur fiqurlu konkisürən Yevgeni Pluşenkonun 13 yaşlı oğlu Aleksandr Pluşenko Azərbaycan bayrağı altında çıxış edəcək.
BAKU.WS-in məlumatına görə, bu barədə məlumat mayın 21-də yayılıb.
Yevgeni Pluşenko xəbəri təsdiqləyərək bildirib ki, oğlu beş il müddətinə Azərbaycanın idman vətəndaşlığını alıb.
"Milli komandada yer almırdı, bu mövsüm müxtəlif səbəblərdən yarışlarda iştirak etmədi və beləliklə karantin müddətini başa vurdu. Heç kimin yerini tutmayıb, mənim şəxsi akademiyamda məşq edirdi", – deyə Pluşenko bildirib.
Aleksandr Pluşenko uşaqlıqdan fiqurlu konkisürmə ilə məşğul olub. Atası onu bu idman növünə yönləndirib, anası – prodüser Yana Rudkovskaya isə onun tanınması ilə məşğul olub. "Qnom Qnomıç" ləqəbi ilə tanınan Aleksandr hələ kiçik yaşlarından buz şoularında iştirak edib və sosial şəbəkələrdə məşhurlaşıb.
Rudkovskayanın sözlərinə görə, Aleksandr doqquz yaşında ildə təxminən 12 milyon rubl qazanırdı. Hazırda onun sosial şəbəkə hesablarını milyonlarla insan izləyir.
Lakin idman nəticələri baxımından Aleksandrın göstəriciləri o qədər də uğurlu olmayıb. O, Rusiya daxili yarışlarında əsasən aşağı pillələrdə qərarlaşıb. Ötən ilin sonunda isə iki turnirdə qalib gəlsə də, hər iki yarışda öz kateqoriyasında yeganə iştirakçı olub.
Rusiya Fiqurlu Konkisürmə Federasiyası Aleksandr Pluşenkoya başqa ölkə adından çıxış etməyə icazə verib. Bununla o, Beynəlxalq Konkisürmə İttifaqının (ISU) təsdiqindən sonra Azərbaycanı beynəlxalq yarışlarda təmsil edə biləcək.
Azərbaycanda rəqabət Rusiyadakı qədər güclü olmadığı üçün Aleksandrın Olimpiadaya düşmək şansı daha yüksək ola bilər. O, daha əvvəl "Bir gün Olimpiadada çıxış edib qızıl medal qazanacağam" deyib.
Aleksandrla yanaşı, Pluşenkonun digər yetirməsi Veronika Zhilina da Azərbaycan bayrağı altına keçib. 18 yaşlı idmançı ötən il də vətəndaşlığını dəyişmək istəmişdi, lakin həmin vaxt ISU buna icazə verməmişdi.
