Axşam vərdişləriniz və fəaliyyətləriniz sağlam və güclü bir ürəyin qorunmasında mühüm rol oynayır...
Poliqon xəbər verir ki, bu barədə EatingWell yazır.
"Həddindən artıq qeyri-müntəzəm yuxu rejimi, gec saatlarda elektron cihazlardan istifadə, ağır gecə yeməkləri və "bayquş" həyat tərzi bioloji saatı poza, qan təzyiqini pisləşdirə və zamanla çəkiyə, qan şəkəri səviyyəsinə və iltihab proseslərinə mənfi təsir göstərə bilər", deyə həkim Rami S. Doss bildirib.
ABŞ Xəstəliklərə Nəzarət və Profilaktika Mərkəzinin məlumatına görə, ürək üçün faydalı axşam rejiminə başlamaq üçün heç vaxt nə tez, nə də gecdir. Çünki ürək xəstəlikləri müxtəlif yaş qruplarındakı insanlara təsir edir.
AHA Journals tərəfindən dərc olunan son məlumatlara əsasən, 20 yaşdan yuxarı amerikalıların təxminən yarısı (48,9 faizi) ürək-damar xəstəliklərindən əziyyət çəkir. Buraya işemik ürək xəstəliyi, ürək çatışmazlığı, insult və hipertoniya daxildir. Mütəxəssislər bildirirlər ki, ürək üçün faydalı olan axşam vərdişlərinin əksəriyyəti nə çətin, nə də çox vaxt aparandır.
"Axşam vərdişlərinizdə edilən kiçik dəyişikliklər, əgər demək olar ki, hər gün tətbiq olunarsa, nəticədə ürəyə böyük müsbət təsir göstərə bilər", deyə Doss vurğulayıb.
Nəşr kardioloqların hər axşam əməl etməyi tövsiyə etdiyi dörd əsas vərdişi sadalayıb:
1. Şam yeməyini daha erkən yeyin
Yediyiniz qidalar ürək sağlamlığına ciddi təsir göstərsə də, yemək vaxtı da böyük əhəmiyyət daşıyır. Xüsusilə günün son qidasının nə vaxt qəbul edilməsi vacibdir.
Nature Communications jurnalında dərc olunan və 100 mindən çox yetkin şəxsin iştirak etdiyi geniş araşdırma göstərib ki, son yeməyi saat 21:00-dan sonra yemək, eyni qidanı saat 20:00-dan əvvəl yeməklə müqayisədə ürək xəstəlikləri riskini artırır.
"Gec və ağır yeməklər reflüksü və yuxu keyfiyyətini pisləşdirə bilər. Zamanla isə yüksək qan təzyiqi, çəki artımı və qan şəkərinə nəzarətin zəifləməsinə səbəb ola bilər ki, bunlar da ürək xəstəliklərinin əsas risk faktorlarıdır", deyə Doss bildirib.
O, son yeməyin yatmazdan ən azı üç saat əvvəl qəbul edilməsini və gecə vaxtı həddindən artıq emal olunmuş qəlyanaltıların qoz-fındıq və meyvə kimi daha faydalı seçimlərlə əvəz edilməsini tövsiyə edir.
2. Şam yeməyindən sonra gəzin
Gec saatlarda intensiv məşqlər yuxuya getməyi çətinləşdirə bilsə də, şam yeməyindən sonrakı vaxt qısa gəzinti üçün ideal hesab olunur.
"Orta səviyyəli fiziki fəaliyyət qan şəkərinin tənzimlənməsinə və qan dövranının yaxşılaşmasına kömək edir. Eyni zamanda orqanizmə günün başa çatdığı siqnalını verir", deyə kardioloq Kristofer Devis bildirib.
Bir çox araşdırma göstərib ki, yeməkdən sonra gəzinti qan şəkərinin yeməkdən sonra sürətli yüksəlməsinin qarşısını almağa kömək edir.
Vaxt az olsa belə, cəmi 10 dəqiqəlik gəzinti belə faydalı hesab olunur.
3. Dərin nəfəs məşqləri edin
Gərgin iş qrafiki, öhdəliklər və stresslə dolu gündən sonra axşam saatlarında həqiqi rahatlanmaya vaxt ayırmaq vacibdir.
"Hətta bir neçə dəqiqəlik meditasiya və ya şüurlu rahatlama məşqləri kortizol səviyyəsini azalda, ürək ritmini yavaşıda və orqanizmi "mübarizə və ya qaçış" vəziyyətindən çıxara bilər", deyə Devis qeyd edib.
Mütəxəssislər axşam rutininə 4-7-8 metodu və ya "qutu nəfəsi" kimi dərin nəfəs texnikalarının əlavə edilməsini tövsiyə edir.
4. Yuxu saatını müəyyənləşdirin və ona əməl edin
Yuxu orqanizmin gündəlik stressdən bərpa olunması üçün əsas imkanlardan biridir və ürək sağlamlığı üçün vacib hesab olunur.
Məqalədə qeyd olunur ki, yuxunun müddəti və keyfiyyəti önəmli olsa da, hər gecə eyni saatda yatmaq infarkt və insult riskini iki dəfə azalda bilər.
2026-cı ilin mart ayında 3 mindən çox orta yaşlı insan arasında aparılan araşdırma göstərib ki, qeyri-müntəzəm yuxu rejimi olan şəxslərdə ciddi ürək problemləri riski sabit yuxu rejimi olanlarla müqayisədə iki dəfə yüksəkdir.
Poliqon.info
