İnvestorların artan skeptisizmi ilə üzləşən Nvidia son rüblük hesabatından istifadə edərək biznesini şaxələndirmək istiqamətində irəliləyişini vurğulayıb. Şirkət data mərkəzlərinin ən iri operatorlarından asılılığını azaltmağa çalışır və bundan sonra həm bulud əsaslı süni intellekt platformalarından, həm sənaye müştərilərindən, həm digər şirkətlərdən, həm də dövlətlərdən gələn tələbat hesabına böyüməyi planlaşdırır.
Daha çox şəffaflıq yaratmaq üçün Nvidia hesabat strukturunu dəyişir: bundan sonra şirkət hiperskeylerlərə və ACIE qrupuna satışları ayrıca açıqlayacaq.
Şirkətin baş direktoru Censen Huanq yenidən “fiziki süni intellekt” mövzusuna — yəni robotlara və avtonom nəqliyyata — toxunub. Bu, Nvidia üçün trilyon dollarlıq potensial bazarlardan biri hesab olunur. Huanqın sözlərinə görə, “süni intellekt fabrikləri”nin — yəni süni intellekt modellərinin öyrədilməsi və işə salınması üçün yaradılan yeni nəsil data mərkəzlərinin — qurulması “son dərəcə yüksək sürətlə” gedir.
Hesabat nə göstərdi: maliyyə nəticələri
26 apreldə başa çatan rübdə Nvidia-nın gəliri 85% artaraq 81,6 milyard dollara çatıb. Bu, gözlənilən 79,2 milyard dollardan yüksək olub. Cari rübdə şirkət təxminən 91 milyard dollar gəlir gözləyir, halbuki bazar konsensusu 87 milyard dollar idi. Düzəldilmiş xalis mənfəət isə hər səhm üzrə 1,77 dollar proqnoza qarşı 1,87 dollar olub.
Maliyyə göstəricilərindəki əsas artım mənbəyi hələ də data mərkəzləri bölməsidir. Bu seqmentin gəliri gözlənilən 73,5 milyard dollara qarşı 75,2 milyard dollar təşkil edib.
Rəqabətin güclənməsi
Analitiklərin həm hesabat, həm də proqnoz üzrə gözləntiləri üstələnsə də, nəticələrin açıqlanmasından sonra Nvidia-nın səhmləri təxminən 0,2% geriləyib. Hesabat dərc olunmazdan əvvəl şirkətin səhmləri ilin əvvəlindən bəri 20% bahalaşmışdı. Bu göstərici S&P 500 indeksini üstələyirdi, amma çip sektorundakı iri rəqiblərin əksəriyyətindən geri qalırdı.
İnvestorlar artıq süni intellekt çipləri istehsalçısından güclü nəticələrə öyrəşiblər və indi onlara sübut lazımdır ki, biznesin böyüməsi yalnız ən iri data mərkəzi operatorlarından asılı olmayacaq.
Şirkət süni intellekt hesablamaları seqmentində dominant mövqeyinə ilk ciddi çağırışlarla üzləşir. AMD öz süni intellekt prosessorlarını irəli aparır, Broadcom və Google alternativ həllər inkişaf etdirir, Nvidia-nın ən iri müştəriləri isə şirkət daxilində öz çiplərini daha fəal şəkildə hazırlamağa başlayıblar.
Çinin zəifliyi
ABŞ-ın ixrac qaydalarına görə Nvidia hələ də Çindəki data mərkəzlərindən gəlir əldə etmir. Halbuki şirkət əvvəllər bu bazarın illik təxminən 50 milyard dollar gəlir potensialına malik olduğunu qiymətləndirirdi. Nvidia bunu yeni istiqamətlərə genişlənməklə kompensasiya etməyə çalışır: mərkəzi prosessorlar, inferens üçün çiplər — yəni artıq öyrədilmiş modellərin real sorğuları emal etdiyi mərhələ üçün məhsullar — həmçinin şəbəkə avadanlığı, proqram təminatı və hazır hesablama sistemləri.
Nvidia səhmdarlara ödənişləri də kəskin artırıb: rüblük dividend hər səhm üzrə 0,01 dollardan 0,25 dollara yüksəlib. Şirkət, həmçinin, hazırkı 5,34 trilyon dollarlıq bazar kapitallaşması fonunda 80 milyard dollarlıq baybek proqramı elan edib.
