Azərbaycan və Gürcüstan arasında sərnişin qatarlarının yenidən fəaliyyətə başlaması turizm sektorunda canlanma yarada bilər. Pandemiyadan sonra uzun müddət bağlı qalan dəmir yolu xətti həm turistlər, həm də sahibkarlar üçün yeni imkanlar vəd edir.
Turizm üzrə ekspertlər bildirirlər ki, qatar səfərləri xüsusilə büdcə səyahətinə üstünlük verən turistlər üçün əlverişli olacaq. Bakı-Tbilisi istiqamətində dəmir yolunun yenidən açılması iki ölkə arasında turist axınını artıra bilər.
Mütəxəssislərin fikrincə, Gürcüstandan Azərbaycana gələn turistlərin sayı arta bilər. Çünki qatar həm rahat, həm də hava nəqliyyatı ilə müqayisədə daha ucuz hesab olunur.
Turizm eksperti qeyd edir ki, xüsusilə yay aylarında Bakı, Qəbələ, Şəki və Naftalan istiqamətlərinə maraq yüksələ bilər. Gürcüstan vasitəsilə Avropadan gələn turistlərin də Azərbaycana keçidi asanlaşacaq.
Bəzi iqtisadçılar hesab edirlər ki, dəmir yolu xəttinin aktivləşməsi hotellər, restoranlar və bölgələrdə fəaliyyət göstərən turizm obyektlərinin gəlirlərini artıra bilər.
Ekspertlər eyni zamanda bildirirlər ki, qatar biletlərinin qiyməti münasib olarsa, bu marşrut aviareyslərə ciddi rəqabət yarada bilər.
