Bakıda 2024-cü ildə COP29-un uğurla keçirilməsi Azərbaycanın praktiki iqlim fəaliyyətlərinə və beynəlxalq əməkdaşlığa sadiqliyini daha da möhkəmləndirib.
"Report" xəbər verir ki, bu barədə Azərbaycan Prezidentinin iqlim məsələləri üzrə nümayəndəsi Muxtar Babayev Bakıda Ümumdünya Şəhərsalma Forumunun 13-cü sessiyası (WUF13) çərçivəsində "Azərbaycanın ilk milli dayanıqlı inkişaf standartının hazırlanması: Davamlı Təcrübələr Standartı (SPS)" tədbirinin iştirakçılarına videomüraciətində bildirib.
O qeyd edib ki, COP29 çərçivəsindəki müzakirələr konkret tədbirlərin həyata keçirilməsinin, dayanıqlılığın, iqlim maliyyələşdirilməsinin və dayanıqlı inkişaf prinsiplərinin dövlət siyasətinə daha dərindən inteqrasiyasının artan əhəmiyyətini vurğulayıb.
"Biz (Azərbaycan - red.) hesab edirik ki, daha güclü dayanıqlı inkişaf standartları bu keçidi dəstəkləyə bilər. Onlar daha dayanıqlı infrastrukturun yaradılmasını, resurs səmərəliliyinin artırılmasını, dairəvi iqtisadiyyatın, ekoloji şəhər planlaşdırmasının, eləcə də daha məsuliyyətli istehsal və istehlak modellərinin inkişafını stimullaşdıra bilər. Anlamaq vacibdir ki, dayanıqlı inkişaf əlavə yük kimi qəbul edilməməlidir. Ona uzunmüddətli dayanıqlığa, iqtisadi səmərəliliyə və insanların rifahına qoyulan investisiya kimi baxılmalıdır", - M.Babayev bildirib.
"Cebheinfo.az"
