Ajans.az MASH teleqram kanalına istinadən xəbər verir ki, problem əsasən texniki servis məntəqələrində kondisioner sistemlərinə keyfiyyətsiz və saxta qaz qarışıqlarının vurulması ilə bağlıdır. İlk mərhələdə kondisioner normal işləsə də, bir müddət sonra kompressor sıradan çıxır, soyutma sistemi fəaliyyətini dayandırır və yanıq qoxusu yaranır. Bəzi hallarda isə kapotun altından tüstü çıxaraq yanğına səbəb olur. Bildirilir ki, orijinal R-134a, R-410A, R-404A, R-227a və R-290 soyuducu maddələri əvəzinə ucuz saxta qarışıqlardan istifadə edilir. Bu maddələr sistem daxilində kimyəvi reaksiyalar yaradaraq korroziyaya və detalların sıradan çıxmasına gətirib çıxarır. Ekspertlərin sözlərinə görə, saxta qarışıqlar alüminium borular və yağla təmas zamanı yüksək istilik yaradan təhlükəli birləşmələr əmələ gətirir. Nəticədə kompressor, kondensator və buxarlandırıcı daxildən zədələnir və bu da yanğın riskini artırır.
Mütəxəssislər avtomobil sahiblərinə kondisioner doldurulmasını yalnız etibarlı servis mərkəzlərində həyata keçirməyi tövsiyə edirlər.
