İsrail XİN 430 nəfərin saxlanıldığını və onların İsrailə aparıldığını açıqlayıb...
Poliqon xəbər verir ki, İsrail Xarici İşlər Nazirliyi “Global Sumud” flotiliyasının bütün iştirakçılarının saxlanıldığını bəyan edib. Nazirliyin yaydığı məlumata görə, ümumilikdə 430 fəal İsrail qüvvələri tərəfindən nəzarətə götürülüb.
Açıqlamada bildirilib ki, saxlanılan şəxslər İsrail gəmilərinə köçürülərək ölkə ərazisinə aparılır. İsrail tərəfi qeyd edib ki, fəallar İsrailə çatdıqdan sonra öz ölkələrinin konsulluq nümayəndələri ilə görüşmək imkanı əldə edəcəklər.
İsrail Xarici İşlər Nazirliyi sosial şəbəkənin X platformasında yaydığı bəyanatda flotiliyanı “növbəti piar aksiyası” adlandırıb.
“Daha bir piar-flotiliya başa çatıb. İsrail bundan sonra da beynəlxalq hüquqa tam uyğun şəkildə fəaliyyət göstərəcək və Qəzzaya tətbiq edilən qanuni dəniz blokadasının pozulmasına imkan verməyəcək”, deyə bəyanatda vurğulanıb.
Qeyd edək ki, “Global Sumud” flotiliyasının məqsədi Qəzza zolağına humanitar yardım çatdırmaq və bölgədə davam edən blokadaya diqqət çəkmək olub. Hadisə beynəlxalq ictimaiyyətdə geniş rezonans doğurub və bir sıra hüquq müdafiə təşkilatları saxlanılan fəalların vəziyyəti ilə bağlı narahatlıqlarını ifadə ediblər.
Poliqon.info
