İlk dəfədir ki, “Şəhər iqlim fəaliyyəti və davamlı urbanizasiya üzrə Bakı Davamlılıq Koalisiyası”nın üzvləri Ümumdünya Şəhərsalma Forumu platformasında bir araya gəlirlər. Bu, növbəti addımların atılması, ən yaxşı uğur hekayələrinin və təcrübələrin paylaşılması üçün yaradılan praktiki bir məqamdır.
AZƏRTAC xəbər verir ki, bu sözləri WUF13 çərçivəsində keçirilən “Şəhər iqlim fəaliyyəti və davamlı urbanizasiya üzrə Bakı Davamlılıq Koalisiyası”nın yüksək səviyyəli iclasında Dövlət Şəhərsalma və Arxitektura Komitəsinin sədri Anar Quliyev deyib.
O qeyd edib ki, dünya şəhərləri eyni vaxtda bir neçə istiqamətdən təzyiq altındadır. İqlim təsirləri getdikcə güclənir. Mənzil tələbatı təklifi üstələyir. Şəhərlərin həm daxilində, həm də şəhərlər arasında bərabərsizlik getdikcə dərinləşir. Növbəti bir neçə ildə qəbul ediləcək və ya təxirə salınacaq qərarlar gələcək onilliklər üçün şəhərsalma inkişafının trayektoriyasını müəyyən edəcək.
“Davamlı və iqlimə dözümlü şəhərlər qurmaq üçün maliyyə ehtiyacları, xüsusilə də inkişaf etməkdə olan ölkələrdə, olduqca böyükdür. Binaların iqlimə uyğunlaşdırılmasından tutmuş enerji səmərəliliyinin artırılmasına və iqlim təsirlərinə qarşı şəhərlərin dözümlülüyünün gücləndirilməsinə qədər xərclər kifayət qədər yüksəkdir və artmaqda davam edir”, - deyə komitə sədri vurğulayıb.
